Drejtorët e rinj të prezantuar ditë më parë, nisën sot punën nëpër qarqet ku janë zgjedhur. Në prezantimin e bërë, ministri i Brendshëm Ervin Hoxha e nisi nga Tirana, duke theksuar nevojën për një angazhim të ri në përmbushje të pritshmërive të qytetarëve.
"Emërimi i Elton Alushit përfaqëson jo vetëm një hap përpara në konsolidimin e strukturave të sigurisë, por edhe një angazhim të ri për të përmbushur pritshmëritë e qytetarëve të kryeqytetit, ku sfidat janë të shumta dhe dinamike, nën vizionin "Shqipëria 2030", nënvizoi ministri Hoxha.
Ndër të tjera ai kërkoi që ngjarjet kriminale të ndodhura të zbardhen sa më shpejt si dhe të rihapen hetime për ngjarje të vjetra të cilat mund të kenë mbetur pa u ndëshkuar dhe për pasojë kanë sjellë zinxhir krimesh.
Ndërsa një tjetër rëndësi në prezantim, Hoxha i kushtoi edhe drejtorit të qarkut të Durrësit, qytet të cilin e konsideroi si zonë e cila kërkon vision të qartë për shkak se është hyrëse në vend.
"Ky qytet ka rëndësi strategjike për shkak të pozicionit, si një portë hyrëse për Shqipërinë. Kjo e bën atë të përballet me sfida komplekse në fushën e sigurisë publike dhe luftën kundër kriminalitetit. Për këtë arsye, drejtimi i strukturave policore në këtë zonë kërkon një vizion të qartë, strategji dhe përkushtim maksimal për zbatimin e ligjit me paanshmëri dhe profesionalizëm", u shpreh ministri në takim me strukturat drejtuese të DVP Durrës.
Vilson Bala vjen në këtë detyrë pas një karrierë të gjatë brenda Policisë. Ai u rendit i pari me pikë, në konkurrim. Ministri nënvizoi se Durrësi kërkon një qasje të mirëkoordinuar për të siguruar një mjedis të sigurt për banorët dhe vizitorët. Versus.al
