Tiranë- Policia ka arrestuar në kryeqytet Elidon Kotorrin të njohur me nofkën “I tmerrshmi i Tiranës”, nën akuzën e kundërshtimit të punonjësve të policisë.
Forcat blu morën informacion se Kotorri, emër i njohur për drejtësinë pasi akuzohet për një masakër të kryer në vitin 1998, kishte pasur konflikt me një person. Sapo efektivët kanë shkuar të shoqërojnë në komisariat, 49 vjeçari i ka kundërshtuar dhe për pasojë e kanë arrestuar.
Kotorri gjatë viteve 2000, ishte një nga emrat më të lakuar si një protagonist i një lufte të egër mes organizatave kryesore kriminale në kryeqytet, edhe për faktin se prokuroria herë e akuzonte për disa vrasje dhe herë e tërhiqte akuzën për ‘‘mungesë provash’.
Më datë 14 dhjetor 1998, në ambientet e jashtme të klubit sportiv “Partizani” u vra me armë zjarri Elton Zajmi. Për këtë ngjarje, Prokuroria e Tiranës akuzoi Andi Hasanin. 13 muaj më vonë, në një atentat te stacioni i fundit i Tiranës së Re, gjeti vdekjen Andi Hasani, i cili ishte në makinën e tij tip “Volvo”, së bashku me shtetasit Sokol Alushi, Gazmend Zeneli dhe Gregor Stefani.
Sipas prokurorisë, Kotorri iu vu pas vrasësit të shokut dhe te “Vasil Shanto”, ka qëlluar me armë zjarri kundrejt tyre. Nga të shtënat mbetën të vrarë Andi Hasani, Sokol Alushi, Gazmend Zeneli, ndërsa Gregor Stefani mbeti i plagosur.
Në vitin 2000 Kotorri u dënua me burgim të përjetshëm, por çështja ndaj tij u rihap me vendim të gjykatës së Strasburgut në 2015-ën. Në datën 21 maj 2015, pas një sërë procesesh, ai u dënua me 25 vite burg dhe u lirua në 2019-ën. Versus.al
