Të paktën 124 persona janë vrarë në një operacion policor në favelat e Rio de Janeiros, Brazil , përfshirë katër oficerë policie, thanë autoritetet .
Operacioni thuhet se kishte në shënjestër anëtarët e bandës "Comando Vermelho" . Bastisja ishte më e përgjakshmja në historinë e qytetit, sipas Sky News.
Imazhet nga agjencitë ndërkombëtare të lajmeve janë tronditëse, me dhjetëra trupa të shtrirë në rrugë, madje edhe në karroca, ku të afërmit po mbajnë zi.
Zyra e Kombeve të Bashkuara për të Drejtat e Njeriut denoncoi numrin e madh të viktimave, duke u deklaruar e “tmerruar” nga operacioni policor.
Eksplozivë nga dronët
Banorët i përshkruan skenat që u zhvilluan të martën në favelat Alemao dhe Penha, në veri të Rios, si "luftë", me shkëmbime zjarri midis policisë dhe personave të armatosur dhe autobusë të vënë në flakë për të krijuar barrikada.
View this post on Instagram
Sipas policisë, anëtarët e bandave përdorën gjithashtu dronë për të hedhur eksplozivë mbi oficerët ndërsa ata sulmonin lagjet që janë fortesa të Comando Vermelho.
“Ja se si kriminelët merren me policinë e Rios: me bomba të hedhura nga dronë. Kjo është shkalla e sfidës me të cilën përballemi. Ky nuk është krim i zakonshëm, ky është narkoterrorizëm”, tha guvernatori i shtetit të Rios, Claudio Castro.
Universitetet dhe shkollat anuluan mësimet dhe banorët mbetën të bllokuar në shtëpitë e tyre ndërsa shpërthyen të shtënat.
Guvernatori tha se bastisja e policisë ishte planifikuar prej dy muajsh. Autoritetet bënë arrestime, përfshirë një burrë që besohet të jetë një udhëheqës i Comando Vermelho.
Ngjarjet
Rio pritet të presë Samitin e Kryetarëve të Bashkive të C40 dhe Çmimin Earthshot të Princit William javën e ardhshme, me të ftuar personazhe të famshëm, përfshirë Kylie Minogue dhe kampionin katër herë të botës në Formula 1, Sebastian Vettel.
Të dy ngjarjet janë pjesë e përgatitjeve për konferencën e OKB-së për klimën COP30, e cila do të mbahet në Belém, në veri të Brazilit, nga 10 deri më 21 nëntor.
Operacionet policore në shkallë të gjerë nuk janë të rralla përpara ngjarjeve ndërkombëtare në Rio, i cili ka pritur Kupën e Botës 2014, Lojërat Olimpike 2016, samitin e G20 2024 dhe samitin e BRICS në fillim të këtij viti./Versus.al
