Të paktën një person është vrarë dhe disa ambasada janë dëmtuar në një sulm me raketa ruse në mëngjes herët në kryeqytetin e Ukrainës, Kiev.
Administrata Ushtarake e Qytetit të Kievit konfirmoi vdekjen në një postim në Telegram, duke shtuar se 12 të tjerë janë plagosur. Nga të plagosurit, pesë u shtruan në spital, ndërsa të tjerët u trajtuan në vendngjarje.
Sulmi erdhi një ditë pasi lideri rus Vladimir Putin sfidoi Ukrainën në një "duel" në konferencën e tij të fundvitit, duke bërë që presidenti ukrainas Volodymyr Zelensky ta quante liderin rus "budalla".
"Le të propozojnë... një lloj eksperimenti teknologjik - një lloj dueli i teknologjisë së lartë të shekullit të 21-të, le të themi," tha Putin gjatë ngjarjes së së enjtes në Moskë. Zelensky në përgjigje hodhi epitetin e vrazhdë ndaj liderit të Kremlinit në komentet e bëra në internet.
Sipas Komandës së Forcave Ajrore të Ukrainës, Rusia gjuajti pesë raketa balistike në Kiev rreth orës 7 të mëngjesit të së premtes. Mbrojtja ajrore e Ukrainës rrëzoi të pesë raketat. Përveç kësaj, 40 UAV u rrëzuan dhe 20 dronë të tjerë nuk arritën objektivat e tyre, sipas komandës. Megjithatë, rënia e mbeturinave shkaktoi dëme dhe lëndime në qendër të qytetit, thanë zyrtarët.
Në një lagje, një ndërtesë zyre, sipërfaqe rrugore dhe tub gazi u dëmtuan dhe pesë makina morën flakë, tha në Telegram Serhiy Popko, kreu i Administratës Ushtarake të Qytetit të Kievit. Në një lagje tjetër, një zjarr ka rënë në vendin e një pallati në ndërtim.
Disa ambasada të vendosura në të njëjtën ndërtesë u dëmtuan, sipas ministrisë së jashtme të Ukrainës, njoftoi zëdhënësi, Heorhii Tykhyi, që e quajti sulmin "barbar".
“Këto janë ambasadat e Shqipërisë, Argjentinës, Palestinës, Maqedonisë së Veriut, Portugalisë dhe Malit të Zi”, tha Tykhyi në një konferencë për media. “Janë thyer dritaret dhe dyert në ambiente.”
Portugalia tha se objekti pësoi dëmtime të lehta dhe thirri të ngarkuarin me punë rus për të protestuar.
Ministria ruse e mbrojtjes tha se lëshoi raketa me rreze të gjatë veprimi në objektivat ushtarake ukrainase të premten, në përgjigje të një sulmi ukrainas që synonte një fabrikë kimike në rajonin e Rostovit të Rusisë në fillim të kësaj jave. Ai sulm u krye duke përdorur raketa ATACMS të prodhimit amerikan, tha ministria.
“Në përgjigje ndaj veprimeve të regjimit të Kievit, të mbështetur nga kuratorë perëndimorë, sot në mëngjes u nis një sulm grupor me armë precize me rreze të gjatë veprimi kundër postës komanduese të SBU, byrosë së projektimit Kyiv Luch, e cila projekton dhe prodhon sistemet e raketave Neptun, Olkha”, shkroi Ministria e Mbrojtjes e Rusisë në Telegram.
“Objektivat e goditjes u arritën. Të gjitha objektet u goditën”, shtoi ai.
