Miliona amerikanë pritet të dalin sot në rrugë në kuadër të protestave “No Kings” - "Jo Mbretër", një lëvizje kundër administratës së ish-presidentit Donald Trump.
Sipas organizatorëve, janë planifikuar më shumë se 3,000 protesta në të 50 shtetet e SHBA-së, si dhe në 16 vende të tjera në botë. Lëvizja drejtohet nga organizata të ndryshme, përfshirë grupe aktiviste, sindikata dhe organizata qytetare.
Një nga organizatorët kryesorë, Ezra Levin, deklaroi se kjo mund të jetë “protesta më e madhe në historinë e Amerikës”.
Protesta kryesore do të zhvillohet në qytetet Minneapolis dhe St Paul, në shtetin e Minesotës, ku pritet të marrin pjesë figura të njohura si senatori Bernie Sanders, aktorja Jane Fonda dhe muzikantët Bruce Springsteen dhe Joan Baez.
Organizatorët theksojnë se protestat do të jenë paqësore, ndërsa pjesëmarrësve u është kërkuar të mos mbajnë armë, edhe nëse janë të lejuara me ligj.
Pakënaqësitë që pritet të nxjerrin qytetarët në rrugë janë të shumta, nga rritja e çmimeve, te politikat e emigracionit dhe të drejtat e votës.
Protesta “No Kings” vjen në një moment tensionesh të larta politike në SHBA, ndërsa autoritetet kanë vijuar ndjekjen penale ndaj disa protestuesve në raste të mëparshme.
