Çfarë do të gjeni në brendësi
*Kuvendi nisi sot seancën plenare me 1 minutë heshtje në nderim të Adem Jasharit dhe familjarëve të tij në kuadër të 28 vjetorit të Epopesë heroike. *Debatet vijuan lidhur me rendin e ditës teksa demokratët kërkonin kalimin në seancë të çështjes së imunitetit të Belinda Ballukut, ndërsa socialistët kërkonin votimin e dekreteve të presidentit Bajram Begaj për shkarkimet dhe emërimet e reja në qeveri. *Teksa PD bllokoi foltoren duke kërkuar që fjala t’i jepej Berishës, socialistët miratuan ndryshimet në qeveri. Ra në sy fakti se gjatë votimit për Spiropalin, Berisha dhe Topalli votuan kundër. Por kjo gjë u sqarua menjëherë nga ish-kryeparlamentarja e cila tha se bëhej fjalë për një lapsus teknik.
Së bashku me Berishën votoi kundër shkarkimit të Spiropalit? Topalli e shpjegon: Ishte lapsus teknik
Deputetja e Partisë Demokratike, Jozefina Topalli ka sqaruar se gjatë votimi për shkarkimin e Elisa Spiropalit si ministre e Jashtme ka ndodhur një lapsus teknik. Sipas saj, gjatë momentit që po votohej, ka shtypur njëkohësisht butonin e saj dhe të Berishës që gjendej në foltore për të kërkuar fjalën.
“Në momentin e kaosit në Parlament, kur opozitës nuk po i jepej fjala, kam shtypur gabimisht dy butonat në sistem për të marrë fjalën. Kjo ka përkuar rastësisht me momentin e votimit për shkarkimin e një ministri. Bëhet fjalë për një lapsus teknik dhe jo për shprehje të vullnetit tim politik. Sqaroj gjithashtu se në atë moment z. Berisha ishte në foltore dhe nuk ka votuar.”- ka shkruar Topalli në rrjetet sociale. Versus.al
PD bllokon foltoren, socialistët votojnë ndryshimet në qeveri! Berisha e Topalli kundër shkarkimit të Spiropalit
Partia Demokratike bllokoi foltoren e Kuvendit pasi kryeparlamentari Niko Peleshi nuk i dha Berishës fjalën për procedurë. Garda e republikës ndërhyri për të mos lejuar përplasjet.
Ndërkohë, socialistët vijuan me votimin për dekretet e presidentit Bajram Begaj mbi ndryshimet në qeverinë Rama 4 ku pati emërime të reja në ministri.
Shkarkimi i ministrave
Belinda Balluku 85 vota pro, 0 kundër
Elisa Spiropali 83 vota, 2 kundër (Berisha, Topalli)
Pirro Vengu 81 vota pro, 0 kundër
Albana Koçiu 83 vota pro, 0 kundër
Besfort Lamallari 83 vota
Toni Gogu 82 vota pro, 0 kundër
Emërimet
Albana Koçiu zv/kryeministre 83 vota pro, 3 kundër
Ferit Hoxha ministër i Jashtëm 83 pro 4 kundër
Besfort Lamallari ministër i Brendshëm 83 vota pro 4 kundër
Ermal Nufi ministër i Mbrojtjes 83 vota pro 6 kundër
Toni Gogu ministër i Drejtësisë 83 vota pro 5 kundër
Enea Karakaçi ministër i Infrastrukturës dhe Energjisë 83 vota pro 6 kundër
Eriona Ismaili ministre e Shtetit për Marrëdhënie me Parlamentin 82 vota pro 4 kundër. Versus.al
“Jam e habitur se i doli fjala Berishës”, Spiropali flet pas shkarkimit si ministre: Për këtë më vjen keq
Elisa Spiropali foli sot për shkarkimin e saj nga posti i ministres së Jashtme kur kishte vetëm 5 muaj që e kishte marrë si detyrë në mandatin e katërt të qeverisë së Ramës.
Spiropali tha se ndihej e qetë për punën që kishte bërë, ndërsa shtoi se e vetmja gjë për të cilën i vinte keq, ishte se largimin e saj e kishte paralajmëruar më parë Berisha.
“Flas shqip, flas troç, kam folur gjithmonë siç duhet, për Shqipërinë dhe me Shqipërinë. Është e vërtetë se ajo detyrë është nder i madh, por edhe çdo detyrë këtu në Kuvend është nder i madh. Jam e qetë, e qartë dhe e vetmja gjë për të cilën më vjen keq është se largimin e paralajmëroi Berisha në Kuvend. Vetëm për këtë jam e habitur, për asgjë tjetër”- tha Spiropali. Versus.al
28 vjetori i epopesë së UÇK-së, Kuvendi nis me 1 minutë heshtje për familjen e Adem Jasharit
Seanca plenare e Kuvendit të Shqipërisë nisi sot me një minutë heshtje për familjen e legjendarit Adem Jashari në kuadër të 28 vjetorit të epopesë heroike të UÇK-së.
28 vjet më parë, më 5, 6 dhe 7 mars 1998, forcat policore dhe ushtarake serbe sulmuan familjen e komandantit të UÇK-së, Adem Jashari, në Lagjen e Jasharëve në Prekaz të Skenderajt.Gjatë tri ditëve sa zgjatën luftimet, u vra Adem Jashari bashkë me 22 anëtarë të familjes së ngushtë dhe 33 anëtarë të lagjes dhe të afërm të tjerë. Versus.al
Kuvendi në seancë plenare, pritet votëbesimi për ministrat e rinj të qeverisë
Seanca e sotme plenare në Kuvend nis në orën 10:00 me fokus kryesor votëbesimin e ministrave të rinj të cilët ditën e djeshme u dekretuan nga presidenti Bajram Begaj pas propozimeve të kryeministrit Edi Rama.
Socialistët do të kërkojnë ndryshimin e rendit të ditës për të votuar të gjithë dekretet e Begajt për ministrat e rinj. Dje presidenti firmosi 13 dekrete, 6 shkarkime dhe 7 emërime.
Vetë Rama njoftoi ndryshimet në qeveri gjatë mbledhjes së grupit parlamentar me dyer të mbyllura.
7 ndryshimet në qeveri:
Albana Koçiu zv.kryeministre - zëvendëson Belinda Ballukun
Enea Karakaçi ministër i Infrastrukturës dhe Energjitikës - zëvendëson Belinda Ballukun
Besfort Lamallari ministër i Brendshëm - zëvendëson Albana Koçiun
Toni Gogu ministër Drejtësie - zëvendëson Besfort Lamallarin
Ferit Hoxha ministër i Jashtëm - zëvendëson Elisa Spiropalin
Ermal Nufi ministër i Mbrojtjes - ikën Pirro Vengu
Eriona Ismaili ministër për Marrëdhëniet me Parlamentin - zëvendëson Toni Gogun
Rendi i ditës në Kuvend:
I. Mbledhjen e Kuvendit në seancë plenare në datën 5.3.2026, ora 10:00.
II. Rendi i ditës i seancës plenare është si më poshtë:
1. Miratimi i procesverbalit të seancës plenare të datës 2.3.2026.
2. Njoftime.
3. Seancë pyetje – përgjigje me Ministrin e Arsimit, znj. Mirela Kumbaro, kërkuar nga deputeti Erion Braçe.
4. Seancë pyetje - përgjigje me Ministrin e Bujqësisë dhe Zhvillimit Rural, z. Andis Salla, kërkuar nga deputeti Erion Braçe.
5. Projektligji "Për një shtesë në ligjin nr. 69/2012, "Për sistemin arsimor parauniversitar në Republikën e Shqipërisë", i ndryshuar".
6. Projektligji "Për ratifikimin e marrëveshjes së huas, ndërmjet Republikës së Shqipërisë, përfaqësuar nga Ministria e Financave (huamarrësi), dhe KfË Frankfurt am Main (KfË), për programin "Infrastruktura bashkiake V - faza II"
7. Projektligji "Për Agjencinë e Mbikëqyrjes në Sistemin e Ekzekutimit të Vendimeve Penale".
8. Projektligji "Për disa ndryshime dhe shtesa në ligjin nr. 46/2018, "Për kontrollin shtetëror të transferimeve ndërkombëtare të mallrave ushtarake dhe të artikujve e teknologjive me përdorim të dyfishtë", të ndryshuar".
9. Projektligji "Për një ndryshim në ligjin nr. 9975, datë 28.7.2008, "Për taksat kombëtare", të ndryshuar",
10. Projektligji "Për një ndryshim në ligjin nr. 68/2017, "Për financat e vetëqeverisjes vendore"",
11. Projektvendimi "Për një shtesë në vendimin nr. 65/2025, "Për caktimin e anëtarëve zëvendësues në përbërjen e komisioneve të përhershme të Kuvendit", i ndryshuar".
12. Diskutime për çështje jashtë rendit të ditës.
