Çfarë do të gjeni në brendësi
*Kryeministri Edi Rama që prej ditës së djeshme ndodhet në një vizitë në Izrael ku do të qëndrojë deri të martën. Sot kryeministri i shoqëruar nga bashkëshortja e tij Linda Rama është pritur nga kryeministri izraelit Benjamin Netanyahu. *Ai vizitoi edhe Murin e Lotëve në Jerusalem ndërsa shprehu lutjen që Zoti t’i sigurojë paqen këtij qyteti. Rreth orës 16:00, pritet që Rama t’i drejtohet kuvendit të Izraelit me një fjalim.
Edi Rama viziton Murin e Lotëve në Jerusalem: Uroj që Zoti, t’i dërgojë këtij qyteti forcën e Paqes!
Kryeministri Edi Rama dhe bashkëshortja e tij, Linda Rama, vizituan sot Murit të Lotëve në Jerusalem, vendi i shenjtë ku hebrenjtë lutën për paqen në tokën e shenjtë.
Rama la një shënim ku shkruante: “Është gjithmonë një përvojë unike të jesh përpara këtij muri. Uroj që Zoti, përmes këtij muri të fuqishëm, t’i dërgojë këtij qyteti forcën e Paqes!”
Mediat izraelite publikuan foto të kryeministrit duke vendosur letrën në mur, ndërsa në kokë mban një Kipah, kapelë që mbahet nga izraelitët si shenjë respekti dhe përulësie ndaj Zotit.
Nga konferenca me Netanyahun tek fjalimi në kuvend, zbardhet agjenda e Ramës në Izrael
Kryeministri Edi Rama që prej ditës së djeshme ndodhet në një vizitë pune në Jerusalem të Izraelit, e cila do të zgjasë deri të martën më 27 janar. Kjo vizitë zhvillohet në kuadër të konferencës ndërkombëtare për luftën kundër Antisemitizmit.
Pjesa kulminante e vizitës pritet të shënohet në orën 16:15 kur Rama t’i drejtohet Kuvendit të Izraelit me anë të një fjalimi gjatë seancës plenare në Knesset. Pjesë e delegacionit në këtë vizitë është edhe Linda Rama, bashkëshortja e kryeministrit. Në orën 11:00, pas takimit me homologun izraelit, Benjamin Netahyanu, dy delegacionet do të mbajnë edhe një deklaratë për shtyp.
Axhenda e plotë:
Ditën e hënë, më 26 janar, ora 11:00 – 12:30 Kryeministri Rama do të zhvillojë një takim kokë më kokë me Kryeministrin e Izraelit, Benjamin Netanyahu, i cili do të pasohet nga takimi mes dy delegacioneve, në përfundim të të cilit do të ketë edhe deklaratë për shtyp.
Paralelisht, znj. Linda Rama, në shoqërinë e znj. Herzog, bashkëshortes së Presidentit të Izraelit, Isaac Herzog, do të zhvillojë një vizitë në Bibliotekën Kombëtare.
Në orën 14:00, Kryeministri Rama, i shoqëruar nga znj. Linda Rama, do të mbërrijë në Knesset “Plaza”, Parlamenti i Izraelit, ku do të pritet me një ceremoni të posaçme shtetërore nga Kryetari i Knessetit. Ceremonia përfshin rojet e nderit, ekzekutimin e himneve kombëtare, si dhe vendosjen e kurorave në monumentin e ushtarëve të rënë dhe në monumentin e viktimave të terrorit.
Më pas, Kryeministri Rama do të firmosë Librin e Përshtypjeve në Hollin Shagall.
Në orën 14:30, Kryeministri Rama dhe delegacioni shqiptar do të zhvillojnë një takim me Kryetarin e Knessetit, z. Amir Ohana.
Në orën 16:15, do të nisë seanca plenare speciale e Knessetit, e shoqëruar nga hyrja ceremoniale në sallë. Gjatë kësaj seance do të mbajnë fjalën Kryetari i Knessetit, z. Amir Ohana, Kryeministri i Izraelit, Benjamin Netanyahu, Lideri i Opozitës, Yair Lapid, si dhe Kryeministri Edi Rama, i cili do t’i drejtohet Parlamentit të Izraelit me një fjalim historik sipas protokollit të posaçëm që Knesseti u ka rezervuar një numri të kufizuar udhëheqësish të huaj dhe së fundmi Presidentit të SHBA, Donald J. Trump.
Në orën 17:15, do të zhvillohet një pritje zyrtare në nder të Kryeministrit Rama, me pjesëmarrjen e ambasadorëve dhe të ftuarve të posaçëm, në Jerusalem Hall të Knessetit.
Ndërsa, znj. Linda Rama do të ketë një takim të veçantë me gratë parlamentare.
Më 27 janar, Kryeministri Edi Rama do të marrë pjesë në Konferencën Ndërkombëtare për Luftën kundër Antisemitizmit, ku do të mbajë një fjalë, në praninë e Presidentit të Izraelit, Isaac Herzog. Gjatë qëndrimit në Jeruzalem, Kryeministri Rama do të kryejë gjithashtu vizita simbolike në Ëestern Ëall (Muri i Lotëve) dhe në Kishën e Varrit të Krishtit. Versus.al
