Reperi i njohur, Noizy paralajmëroi koncertin e tij madhështor më 21 gusht në stadiumin ‘Selman Stërmasi’, menjëherë sapo doli nga paraburgimi dhe sërish me një postim tjetër zyrtar në rrjet.
Koncertin, të cilin reperi e konsideron si më të dëshiruarin do të ketë shumë surpriza që do të mbahen mend gjatë.
Sipas reperit, emri i vërtetë i të cilit është Rigels Rajku, tashmë asgjë nuk mund ta ndalë ndonëse u munduan që të ndikonin për keq në karrierën e tij.
“Plani politikës ishte të më ndalnin suksesin dhe punën që unë di të bëj më së miri ‘Muzikën&Koncertet’, mirëpo Zoti kishte plane të tjera për mua dhe ja ku jemi këtu duke ju vërtetuar se asgjë nuk mund të na ndalë kur jemi në të drejtën tonë dhe në rrugë të Zotit”, shkruan reperi.
Noizy kishte pohuar edhe më parë që nuk kishte gisht në ngjarjen e ndodhur në Pejë, ku u rrah brutalisht Medi Iseni, por drejtësia bëri punën e saj duke ndjekur rrugët ligjore.
Ndërkohë postimin e mëposhtëm Noizy e fshiu pas pak çastesh, pasi duket qartazi shënjestrimi që i kishte bërë politikës duke e cilësuar si përgjegjëse për atë që i ndodhi dhe se qëllimi i tyre ishte të ndalonin aktivitetet muzikore të reperit.
Noizy shtoi gjithashtu se për sa kohë ai udhëton në rrugë të drejtë asnjë pengesë nuk mund ta ndalë, po kështu as fuqia e politikës.
Reperi qëndroi disa ditë në paraburgim deri sa u lirua, pasi ofroi garanci pasurore 50 mln lekë të vjetra.
Së bashku me Noizyn u arrestua e DJ i tij Crax, por ai nuk është liruar ende pasi është shtetas i Kosovës dhe procedurat që ndiqen nuk janë të njëjta.
/ Versus.al
