Kryetari i Partisë Demokratike Sali Berisha parashtroi disa propozime të demokratëve sa i takon Reformës Territoriale. Ai tha se në Shqipëri duhet të rikthehen komunat aty ku ka mbi 1300 banorë duke marrë si shembull Francën. Ndërsa shtoi se duhet gjithashtu të krijohen rajonet dhe bashkitë e reja sipas numrit të popullsisë.
Sipas Berishës, kjo është thirrja dhe mundësia e fundit për të mos i përjashtuar shumë banorë nga territori nëpërmjet mosofrimit të shërbimeve.
“Franca numëron 36 mijë komuna, potenciali më i madh bujqësor i Europës, dhe ka komuna me 1500 banorë. Ndaj dhe ne duhet të rikthejmë me përparësi në zonat kodrinore malore shërbimet dhe komunat si thirrja dhe mundësia e fundit për të mos i përjashtuar nga territori.
Duhet të përcaktohet numri i banorëve për bashkitë në qytetet satelite të qyteteve të mëdha. Duhen të rikthehen bashkitë apo komunat, sido që të jetë termi. Kamza është qyteti i gjashtë në Shqipëri sipas censusit të 2011. Duhet të krijohen bashkitë në mënyrë që aty ku është e mundur.
110 mijë banorë ka Sukthi, tani është i shuar. Sukthi është dy herë sa Shijaku për numër banorësh, por për Edi Ramën nuk ka rëndësi. Duhet të bëjmë një përpjekje të madhe për një hartë që duhet të bazohet në kritere shkencore, demografike ku të ketë dy parime: shërbimet ndaj qytetarit dhe zhvillimin e vendit”, tha Berisha.
“Ne i qëndrojmë rajoneve. Duhet të jenë me të gjithë kapacitetet për t’iu përgjigjur Europës së rajoneve. Sot ne përcaktojmë parimet, por duhet bërë një debat i gjerë në të gjithë territorin që të dalim me skemën përfundimtare. Komisioni ka përpunuar disa variante, nuk kemi një përfundimtar sot. Ai do të dalë pas një debati që do bëhet në shkallë kombëtare”, shtoi më tej kryedemokrati. Versus.al
