Çfarë do të gjeni në brendësi
*Seanca e planifikuar për t’u mbajtur sot në Kuvend ku do të votoheshin ndryshimet e kabinetit qeverisës, është shtyrë për në ditën e nesërme. *Deputetët janë në pritje të dekretimit nga Begaj të emrave të ministrave të rinj në qeverinë “Rama 3”. *Grupi parlamentar i PS zhvilloi sot një mbledhje urgjente ku u prezantua Niko Peleshi si kryetar, ndërsa kryeministri Edi Rama u kërkoi deputetëve që të jenë më të angazhuar përgjatë seancave plenare në Kuvend. Gjithashtu duke thënë se disa prej deputetëve aktualë nuk e meritojnë të jenë në lista, Rama u vuri afat prillin e ardhshëm për të ndryshuar mendim për ta.
Ishte planifikuar të mbahej sot, shtyhet seanca e jashtëzakonshme parlamentare
Seanca e jashtëzakonshme plenare e parashikuar për t’u mbajtur sot në Kuvend në orën 18:00, është shtyrë për ditën e nesërme.
Pritet që presidenti Bajram Begaj të dekretojë emrat e rinj të propozuar nga kryeministri Edi Rama si anëtarë të kabinetit qeveritar. Ndërsa Kuvendi do të mblidhet nesër për të votuar Elisa Spiropalin si kryetare dhe ministrat e rinj të kabinetit qeveritar.
Për këta të fundit, zërat nga opozita u shprehën mjaft skeptikë duke parë se në krye të dikastereve më të rëndësishme Rama zgjodhi të emërojë figura jo-politike, gjë që sipas opozitës do t’i mundësojë kreut të ekzekutivit pushtet të plotë në fusha të ndryshme. Versus.al
“Të jeni më aktivë”, zbardhet porosia e Ramës ndaj deputetëve për seancat në Kuvend
Detaje të reja janë zbardhur nga mbledhja urgjente që po zhvillon sot PS pas emërimeve të reja në grupin parlamentar në Kongresin e mbajtur ditën e djeshme.
Të pranishëm në mbledhje ku u konfirmua Niko Peleshi si kryetar i ri i grupit parlamentar, ishin edhe ministrat e rinj të kabinetit. Ndërsa mësohet se kryeministri Edi Rama u ka kërkuar deputetëve të jenë më të angazhuar sa i takon seancave plenare në Kuvend. Versus.al
Ndryshimet në qeveri dhe në grupin parlamentar, mbledhje urgjente e PS! 30 firma për Spiropalin në krye të Kuvendit
Ditën e sotme Kuvendi ishte planifikuar të mblidhej në një seancë të jashtëzakonshme plenare në orën 18:00 për të votuar ndryshimin e kryetares së Kuvendit, duke votuar mbi propozimin e Elisa Spiropalit si zëvendëse të Lindita Nikollës e cila dha dorëheqjen nga detyra disa ditë më parë për shkak të problemeve shëndetësore. Por seanca u shty për nesër.
Seanca vjen pasi sesioni parlamentar konsiderohej i mbyllur por plani ndryshoi me emërimet e reja të cilat kryeministri Edi Rama i bëri publike gjatë Kongresit të PS të zhvilluar ditën e djeshme.
Ndërkohë, mëngjesin e sotëm një mbledhje urgjente zhvilloi edhe grupi parlamentar i Partisë Socialiste sa i takon zgjedhjes së strukturave drejtuese, kjo pasi kryeministri Edi Rama caktoi Niko Peleshin në krye, duke e zëvendësuar me Pirro Vengun në ministrinë e Mbrojtjes. 30 deputetë firmosën shkresën ku Elisa Spiropali propozohet si kryeparlamentare dhe tashmë shkresa i është dorëzuar sekretarisë së Parlamentit.
Po ashtu, në ministrinë e Mbrojtjes, u emërua Ervin Hoxha i cili mban aktualisht postin e kreut të IKMT. Ndërsa Taulant Ballës iu besua drejtimi i dikasterit të ministrisë së Marrëdhënieve me Parlamentin. Ndryshime pati edhe në ministrinë e Financave ku u largua Ervin Mete duke e zëvendësuar këtë të fundit me Petrit Malajn i cili mban aktualisht postin e drejtorit të Agjencisë Kombëtare të Burimeve Natyrore.
Ndryshimet u pritën me reagime edhe nga deputetët demokratë të cilët i cilësuan ministrat e rinj si “anonimë që i lehtësojnë punën Ramës”. Ndërsa kreu i grupit parlamentar të PD, Gazment Bardhi njoftimin e Kuvendit për seancë plenare e shpërndau tek deputetët e tjerë, duke vënë në dukje se presidenti Bajram Begaj kishte qenë në zyrë edhe ditën e dielë duke dekretuar me urgjencë emrat e propozuar nga Rama. Versus.al
