Një aksident i rëndë është regjistruar në aksin rrugor nacional “Pushimi i Shoferit”-Fier Shegan, në rrugën Fier-Lushnjë.
Ngjarja ka ndodhur në dalje të fshatit Rrupaj, ku dy automjete janë përplasur me njëri-tjetrin. Sipas informacioneve paraprake, një mjet me targa greke ka tentuar të kryejë një manovër parakalimi, por për shkak të veprimit të gabuar ka goditur automjetin me targa italiane.
Si pasojë e përplasjes, automjeti me targa italiane ka dalë nga rruga dhe ka përfunduar në kanal.
Tre personat që udhëtonin në këtë mjet, një çift bashkëshortësh dhe djali i tyre i rritur, janë transportuar me urgjencë drejt Spitalit të Lushnjës me dy ambulanca.
Në vendngjarje kanë mbërritur forcat e policisë, të cilat po kryejnë veprimet për dokumentimin e aksidentit dhe menaxhimin e trafikut.
Ky aks rrugor është një prej segmenteve me ngarkesë të lartë trafiku, ndërsa problematikat e infrastrukturës dhe ngushtësia e rrugës janë bërë shpesh shkak për aksidente./Versus.al
