Pavarësisht rasteve të rënda të shkaktuara për shkak të përhapjes së kriminalitetit tek të rinjtë, duket se veprimet shqetësuese prej tyre nuk kanë të ndalur dhe vetëm sa shtohen.
Këtë herë, një 12 vjeçar ka publikuar në rrjete sociale një video ku shfaqet duke qëlluar në ajër me pistoletë manovër pranë disa banesave. Në njoftimin ditor, policia bën me dije se komisariati nr.1 ka nisur hetimin për babain e të miturit, 53 vjeçarin B.X, ndërsa ka sekuestruar pistoletën.
“Specialistët për Hetimin e Krimeve të Komisariatit të Policisë Nr. 1 referuan materialet në Prokurori, ku nisi procedimi në gjendje të lirë për shtetasit: -B. X., 53 vjeç, pasi në një video të postuar në portalin “JOQ”, shfaqet djali i tij 12 vjeç, duke qëlluar në ajër, me pistoletë manovër. Ky send u gjet nga Policia dhe u sekuestrua me cilësinë e provës materiale, bashkë me 14 fishekë manovër”- thuhet në njoftim.
Mbetet “enigmë” sesi armë të tilla bien në duart e të miturve, ndërsa raste të ngjashme të qasjes së tyre tek armët e zjarrit janë publikuar dhe më herët në qarqe të ndryshme të vendit. Me rritjen e kriminalitetit tek të miturit, siguria publike po vihet gjithmonë e më shumë në dyshim, duke pasur në kujtesë edhe ngjarjen tragjike të ndodhur në nëntor të vitit të kaluar në Tiranë ku një 14 vjeçar u vra me thikë nga bashkëmoshatari i tij. Versus.al
