Policia italiane vazhdon hetimet mbi vrasjen e studentes shqiptare Ilaria Sula-s, 22 vjeç, e cila u gjet e pajetë më 2 prill 2025, e futur në një valixhe dhe e hedhur në një greminë në Poli. Detajet e reja të zbuluara nga hetuesit po e rëndojnë gjithnjë e më shumë situatën për ish të dashurin e saj, Mark Antony Samson, 23 vjeç, i cili ka pranuar krimin dhe ndodhet në paraburgim.
Gjurmë gjaku në dhomën e vrasësit
Policia shkencore ka kryer një kontroll të hollësishëm në apartamentin e tij në rrugën Homs në Romë, ku janë gjetur njolla gjaku në dhomën e gjumit të 23-vjeçarit. Hetuesit do të rikthehen përsëri për analiza të mëtejshme. Nga të dhënat paraprake, Ilaria është goditur të paktën katër herë me thikë, kryesisht në qafë. Prokuroria po shqyrton mundësinë e shtimit të akuzave për vrasje me paramendim dhe me egërsi, përveç akuzave për vrasje dhe fshehje të trupit që tashmë janë ngritur ndaj Samsonit.
Ku është arma e krimit?
Një nga çështjet ende të paqarta është arma e përdorur për vrasjen. Në apartament është sekuestruar një thikë e pastër, por besohet se nuk është ajo me të cilën u krye krimi. Një tjetër thikë është nën hetim për të zbuluar nëse është arma e vrasjes. Vetë i riu ka deklaruar se e ka hedhur thikën në një kazan mbeturinash, por nuk është e sigurt nëse kjo është e vërtetë apo një përpjekje për të shpërqendruar hetuesit.
Trupi i mbajtur për më shumë se 20 orë në shtëpi
Një nga detajet më tronditëse që kanë zbuluar hetuesit është se trupi i pajetë i Ilaria Sula-s është mbajtur për më shumë se 20 orë në apartamentin e Samsonit para se ai ta transportonte në makinë dhe ta hidhte në greminë.
Ky detaj është zbuluar falë një autoveloksi, i cili ka regjistruar makinën e familjes së Samsonit duke kaluar pranë zonës së Poli-t rreth orës 18:00 të datës 26 mars. Ilaria ishte parë për herë të fundit gjallë natën e 25 marsit, kur u largua nga shtëpia e saj për të shkuar tek Mark. Kjo do të thotë se ajo është vrarë natën vonë dhe ka qëndruar në shtëpi deri pasdite.
Çfarë dinin prindërit e Samsonit?
Një tjetër pikë kyçe e hetimeve është roli i prindërve të Mark Antony Samson. Ata ndodheshin në shtëpi natën e vrasjes dhe gjithashtu në orët e mëngjesit e të pasdites së nesërme. A e dëgjuan krimin? A e panë trupin? A ndihmuan në fshehjen e provave?
Policia nuk ka ngritur ende akuza kundër tyre, por po shqyrton mundësinë e përfshirjes së tyre në krim, qoftë për ndihmë në fshehjen e trupit, qoftë për bashkëpunim në vrasje. Ata u morën në pyetje mbrëmjen e së mërkurës në polici.
Trupi i transportuar në valixhe
Samson e ka futur trupin e pajetë të Ilaria-s në një valixhe dhe më pas e ka transportuar me makinën e tij drejt një zone të izoluar në Capranica Prenestina, ku e ka hedhur në një greminë. Policia po kryen analiza në makinën e tij për të gjetur prova të reja që mund të ndihmojnë hetimet.
A u tërhoq Ilaria në një kurth?
Një tjetër hipotezë që po shqyrtohet është se Ilaria mund të jetë tërhequr në një kurth nga ish i dashuri i saj. Miqtë e saj kanë treguar se ajo doli nga shtëpia më 25 mars duke marrë vetëm telefonin, si dikush që ka një takim të papritur ose që nuk planifikon të qëndrojë gjatë jashtë. Nuk dihet ende çfarë arsye kishte për të shkuar tek Mark, duke qenë se ata ishin ndarë prej disa kohësh dhe fqinjët thanë se ajo nuk ishte parë aty për muaj të tërë.
Përdorimi i telefonit të viktimës
Një tjetër element që po hetohet është mundësia që pas vrasjes, dikush të ketë përdorur telefonin e Ilaria-s për të krijuar idenë se ajo ishte ende gjallë. Nëse kjo provohet, atëherë do të jetë një tjetër provë e fortë se krimi ishte i mirëplanifikuar.
Familja e viktimës në gjendje të rënduar psikologjike
Trupi i Ilaria Sula-s ende nuk është identifikuar zyrtarisht nga familjarët e saj. Nëna e saj është në një gjendje të rëndë psikologjike dhe nuk është e aftë të bëjë njohjen e trupit.
Hetimet vazhdojnë
Ndërsa policia dhe prokuroria vazhdojnë të mbledhin prova, disa pika të rëndësishme ende mbeten të paqarta:
• Pse shkoi Ilaria tek Mark atë natë?
• A e ka ndihmuar dikush vrasësin për të fshehur trupin?
• A kanë qenë prindërit e tij të përfshirë në krim?
• Ku ndodhet arma e vërtetë e vrasjes?
Autopsia do të jetë vendimtare për të përcaktuar kohën e saktë të vdekjes dhe për të zbuluar më shumë detaje mbi rrethanat e vrasjes. Hetuesit po punojnë për të zbardhur çdo mister dhe për të siguruar që të gjithë ata që janë përfshirë në këtë krim të rëndë të dalin para drejtësisë./Versus.al/
