Ish-ministri i Mbrojtjes, Fatmir Mediu, është paraqitur këtë të mërkurë përpara Gjykatës së Posaçme Kundër Korrupsionit dhe Krimit të Organizuar (GJKKO), në kuadër të procesit gjyqësor për shpërthimin tragjik në Gërdec, që i mori jetën 26 personave në vitin 2008.
Gjatë seancës, Mediu deklaroi se gjykata duhet të marrë parasysh një sërë dëshmish të dhëna në Shtetet e Bashkuara të Amerikës nga personalitete me profil të lartë ushtarak dhe politik të kohës. Ai njoftoi se gjashtë kongresmenë amerikanë i kanë dërguar një letër zyrtare Ministrisë së Drejtësisë së Shqipërisë, duke kërkuar që dëshmitë e dhëna me afidavit në SHBA të kenë peshë ligjore në këtë proces.
“Këto janë deklarime të bëra nën betim dhe kanë statusin e provës në sistemin gjyqësor amerikan,” tha Mediu në sallën e gjyqit. Sipas tij, këto dëshmi hedhin dritë mbi rolin dhe bashkëpunimin ndërkombëtar në çështjen e demontimit të armëve, duke përjashtuar përgjegjësinë personale që i atribuohet.
Megjithatë, burime pranë sistemit gjyqësor theksojnë se kongresmenët që kanë firmosur këtë letër nuk kanë pasur ndonjë lidhje të drejtpërdrejtë me procesin e Gërdecit apo me zhvillimet konkrete të kohës. Kjo ka ngritur dyshime nëse bëhet fjalë për një përpjekje për të ushtruar ndikim të jashtëm mbi drejtësinë shqiptare.
Një zyrtar i sistemit të drejtësisë, në kushte anonimiteti, u shpreh: “Kjo lëvizje mund të perceptohet si një formë presioni diplomatik mbi një proces që duhet të zhvillohet në mënyrë të pavarur dhe në përputhje me Kushtetutën dhe ligjet shqiptare.”
Çështja “Gërdeci” vijon të mbetet një nga plagët më të rënda të historisë së re shqiptare, ndërsa pas më shumë se 15 vitesh, përpjekjet për zbardhjen e përgjegjësive vijojnë mes debatit politik dhe betejës ligjore. /Versus.al
