Komisioni i Pastërtisë së Figurës dhe Pasurisë i ngritur për përzgjedhjen e drejtuesit të ri të Byrosë Kombëtare të Hetimit (BKH) ka nisur procedurat për vlerësimin e kandidatëve.
Komisioni përbëhet nga dy prokurorët e SPAK, Behar Dibra dhe Eneid Nakuçi, kryetarja e Apelit të GJKKO-së, Saida Dollani, dhe dy agjentë të BKH-së.
Shtatë kandidatët kanë dorëzuar dokumentacionin e kërkuar dhe kanë dhënë miratimin për kontroll pasuror dhe të figurës për vete dhe familjarët e tyre. Tani kandidatët do të shortohen për të përcaktuar relatorin nga anëtarët e Komisionit, i cili do të merret me secilin kandidat.
Ndërkohë, më 1 shtator Këshilli i Lartë i Prokurorisë (KLP) do të mbajë mbledhjen për të konstatuar përfundimin e mandatit pesëvjeçar të Aida Hajnajt, e cila ka drejtuar BKH-në.
Deri në përzgjedhjen e drejtuesit të ri të propozuar nga SPAK, drejtimin e Byrosë do ta marrë zv.drejtori Joni Keta, i cili gjithashtu është kandidat për këtë post.
Procesi i përzgjedhjes ka ngjallur debat dhe polemika, jo vetëm mbi kandidatët e mundshëm, por edhe lidhur me mundësinë e riemërimit të Aida Hajnajt për një mandat të dytë. Rrjedhja e votimit nga KLP pritet të zbulojë nëse emri i propozuar nga SPAK do të miratohet në bllok, apo votat do të shpërndahen sipas preferencave individuale./Versus.al
