Tiranë- Tetë persona jaën vënë nën hetim nga policia pas protestës së mbrëmshme të opozitës para kryeministrisë ku u hodhën me dhjetëra lëndë shpërthyese molotov.
Mes të proceduarve, është edhe një 17 vjeçar. Dyshohet se këta persona, kanë hedhur flakadanë dhe molotovët në drejtim të kryeministrisë.
"Gjithashtu, këta specialistë, në vijim të veprimeve hetimore dhe procedurale të kryera për protestën e zhvilluar mbrëmjen e djeshme, referuan materialet në Prokurori ku nisi procedimi në gjendje të lirë për shtetasit R. D., 20 vjeç, M. P., 22 vjeç, S. L., 69 vjeç, B. Xh., 33 vjeç, A. L., 38 vjeç, B. Xh., 34 vjeç, D. P., 62 vjeç, dhe një 17-vjeçar. Këta shtetas dyshohet se gjatë protestës, kanë ushtruar veprime të dhunshme, kanë hedhur flakadanë dhe molotovë, në drejtim të kryeministrisë", thuhet në njoftimin e policisë.
Në protestën e mbrëmjes së djeshme që zgjati rreth 2 orë, protestuesit filluan të hidhnin molotov menjëherë sapo fjalën e mori kryedemokrati Sali Berisha me anë të një lidhje virtuale nga banesa ku po mbahet në arrest shtëpie për privatizimin e ish-kompleksit Partizani.
Fatmirësisht, nga flakadanët nuk pati të plagosur. Menjëherë pas përfundimit të fjalës së Berishës protestuesit u nisën drejt bashkisë së Tiranës. Dy kushtet e vendosura nga opozita në protestën e mbrëmshme ishin qeveri teknike dhe lirimi i Berishës nga arresti shtëpiak. Versus.al
