Detaje të reja janë zbardhur nga dosja hetimore e ish-deputetit të Partisë Socialiste Jurgi Çyrbja i akuzuar për lidhjet e tij me krimin e organizuar.
Nga mesazhet e dërguara në SKYECC shihet se si Jurgis Çyrbja ndihmoi një personazh të krimit të organizuar me dy emra i kërkuar me 'pullë të kuqe' nga zyra e Interpolit Tiranë, pasi Gjykata e Romës e kishte dënuar atë me 6 vjet e 8 muaj burg me akuzën e ‘Trafikut të narkotikëve’
Dhe bëhet fjalë për Kreshnik alias Sokol, Besnik Budlla ose Farroku i cili gjithashtu rezulton i dënuar nga gjykata e Madritit me 7 vjet e 6 muaj burgim, për akuzën e krimeve kundër shëndetit dhe falsifikim dokumentesh.
Aktualisht Kreshnik Budlla, është në proces gjykimi për Konfiskimin e pasurisë në Gjykatën e Posaçme Kundër Korrupsionit dhe Krimit të Organizuar.
Në komunikimet e zhvilluara mes Jurgis Çyrbjes dhe Kreshnik Farrokut, gjatë muajve nëntor 2020-shkurt 2021, konstatohet se në datën 2 dhjetor 2020, Çyrbja, informon bashkëbiseduesin Farruku, që të kontrollonte ambientin përreth banesës së tij, pasi kishte informacion se mund të ishte në vëzhgim nga strukturat shtetërore dhe më konkretisht nga punonjësit e Shërbimit Informativ, shkruan Oraneës.
"...Vetëm shih SHIK-un mos ka njeri vërdallë..."-i shkruan Çyrbja, personit në kërkim, Kreshnik Farruku.
Gjithashtu në bisedat e zhvilluara mes datës 27 dhjetor 2020 deri në 29 shkurt 2021, Kreshnik Budlla alias Farroku, i konfirmon Jurgis Çyrbja faktin se ishte pa punë, dhe person i shpallur në kërkim.
Ndërkohë që zona ishte e rrethuar me punonjës policie, ndaj ka kërkuar prej tij që të interesohej për ta konfirmuar një informacion të tillë, për këtë shkak ishte larguar dhe nga banesa ku jetonte
Ndër të tjera Kreshnik Farroku i shkruan Çyrbjas:
"...si thu vlla, vjen dot. Po ca të bojm, punë s’kemi, kërkim jemi... Po më thonë çunat është rrethuar zona,pyet pak, ka naj gjo se unë lëviza nga zona. Jam Peralt, ki ai me gur, ki parasysh, Ki kasteli...".
Ndërsa Jurgis Çyrbja i konfirmon faktin se e dinte vendin ku e kishin lënë për tu takuar duke i shkruar se: "...Po e di, një min".
Gjithashtu në 29 dhjetor 2020 Kreshnik Budlla, ka kërkuar nga Jurgis Çyrbja, që të pyeste lidhjet e tij për punonjësit e policisë që kishin rrethuar zonën ku banonte, duke i shkruar si më poshtë:
"...ik takoje pak, shif si është puna? Pse po sillen në zonë, jan civilë, katër-pesë makinë, X5 dhe dy tre makina...".
Jurgis Çyrbja e pyet Farrokun për ngjyrën e automjetit, dhe pas disa çastesh i konfirmon bashkëbiseduesit se nuk ishin punonjësit e policisë së Durrësit, duke i shkruar si më poshtë:
"...ça ngjyre është X 5 gri? Se Durrësi nuk është...".
Në komunikimet në vijim, Kreshniku i konfirmon Çyrbes faktin se punonjësit e policisë i kishin marrë të vëllanë , por nuk dinte arsyen, por më pas i konfirmon se e kishin lënë të lirë pasi kërkonin arrestim e tij.
Ky i fundit i shkruan Jurgis Çyrbjas në “Sky” duke i dërguar mesazhet: "... kanë morë vëllain e vogël, vlla. Tani, Se di pse. Pyt pak ça kan, unë këtu jam.... E kanë lënë atë burazerin, më kërkojnë mu...".
Ndër të tjerat në bisedat e zhvilluara në vijim, Kreshniku e informon Çyrben mbi faktin e bllokimit të gjitha llogarive të tij bankare, nga SPAK, pasi ndaj tij ishte hapur një hetim pasuror.
Kreshniku i thotë Çyrbes se: "...vlla jan blloku gjithë llogaritë e mia...".
Sot e kësaj dite kjo çështje, për hetimin pasuror të Kreshnik Farrokut, vijon të jetë ende në proces gjykimi pranë gjykatës së posaçme./Versus.al
