Një histori e ndërlikuar krimesh, hakmarrjeje dhe lidhjesh personale që përfshijnë emrin e Roan Brahimit, ka shpërthyer sërish me dy atentate të njëpasnjëshme në Lezhë dhe Tiranë, ku një person u vra dhe katër të tjerë mbetën të plagosur, mes tyre edhe dy fëmijë.
Nga Athina në Shqipëri: Hakmarrja ndjek familjen
Roan Brahimi, i njohur edhe si Sidorel Prendi, u vra më 9 maj 2024 në Athinë, në prani të gruas dhe djalit të tij të mitur. Ai ishte kthyer për të festuar Pashkët me familjen që kishte atje, por atentati rezultoi fatal. Dy atentatorë me motor i morën jetën brenda makinës së tij luksoze.
Por historia e Brahimit nuk mbaron me vdekjen. Mbrëmjen e djeshme, babai i tij Gjovalin Prendi u vra me breshëri plumbash në fshatin Pllanë të Lezhës, brenda biznesit të familjes. Policia po heton nëse ky është një zinxhir hakmarrjeje që vijon edhe pas vdekjes së 32-vjeçarit famëkeq.
Gruaja në Shqipëri, objektiv i atentatit në Tiranë?
Rreth 45 minuta pas vrasjes në Lezhë, një tjetër atentat ndodhi në zonën e Lundrës në Tiranë, ku një automjet tip G-Class u qëllua me breshëri. Brenda tij ndodheshin katër persona, mes tyre dy fëmijët 11 dhe 17 vjeç të një biznesmeni sigurie.
Nga hetimet paraprake dyshohet se objektivi nuk ishte automjeti i qëlluar, por bashkëshortja e Roan Brahimit që jeton në Shqipëri, e cila përdor një makinë identike me targa shumë të ngjashme me atë që u qëllua. Kjo pistë është aktualisht një nga më të fortat që po shqyrtohet nga autoritetet.
Jetë me dy gra, mes krimit dhe arratisjes
Roan Brahimi kishte dy gra: një në Shqipëri, me të cilën kishte fëmijë dhe bashkëjetonte para se të largohej nga vendi, dhe një tjetër në Greqi, me të cilën kishte një djalë të mitur dhe ishte martuar kohët e fundit. Pikërisht këtë të fundit kishte shkuar të vizitonte në Athinë kur u ekzekutua.
Pas atentatit të djeshëm në Tiranë, dyshohet se hakmarrja po zgjerohet ndaj grave dhe familjarëve të tij, duke e kthyer sagën kriminale të Roan Brahimit në një dramë të përgjakshme që shtrihet në disa shtete dhe prekin njerëzit më të afërt të tij.
Një sagë që nuk mbyllet me vdekjen
I përfshirë në disa ngjarje kriminale të viteve të fundit dhe me një listë armiqsh të gjatë, emri i Roan Brahimit është kthyer në simbol të përplasjeve të armatosura që kanë lënë viktima të shumta. Me dy gra, një jetë të dyfishtë mes Shqipërisë, Dubait dhe Greqisë, dhe lidhje të shumta me emra të njohur të botës së krimit, edhe pas vdekjes, hijet e së shkuarës duket se nuk do ta lënë rehat as familjen e tij.
Policia shqiptare dhe ajo greke po thellojnë hetimet për të kuptuar nëse dy atentatet e fundit janë pjesë e së njëjtës linjë hakmarrjeje që e ndoqi Brahimin deri në fund – dhe tani po ndjek gratë e tij. /Versus.al/
