Safet Bajri, një emër i njohur për drejtësinë shqiptare dhe atë ndërkombëtare është marrë në pyetje në lidhje me një ngjarje kriminale të ndodhur javën e fundit në zonën e Shkodrës.
Ai është ndaluar nga policia e Lezhës, dhe më pas është shoqëruar për në komisariatin e policisë së Shkodrës, ku ka dhënë deklarime në lidhje me vendndodhjen e tij mbrëmjen e 23 gushtit, kur u qëllua në zonën e Vaut të Dejës një breshëri me plumba mbi një mjet të blinduar.
Versus.al mëson se makina e Safet Bajrit ka kaluar në afërsi të vendngjarjes pak pas atentatit ku dyshohet se u qëllua mbi Audi-n e blinduar.
Për këtë ngjarje policia ka shpallur në kërkim Andrea dhe Aleksandër Prendin, ndërkohë që në kërkim dyshohet se është dhe një kushëri i tyre.
Jo zyrtarisht, u tha se shënjestër e atentatit të 23 gushtit në Vaun e Dejës mund të ketë qenë Elion Hato, një tjetër personazh i botës së krimit, i përfshirë në disa ngjarje të rënda dhe aktualisht i shumëkërkuar nga policia.
Por çfarë ndodhi sot
Pak pas mesditës së sotme, Safet Bajri ka qenë duke lëvizur me automjetin e tij të blinduar S-Class dhe në afërsi të Lezhës atij i është bërë shenjë që të ndalojë, pasi ai rezultonte si person interesi në lidhje me hetimet e nisura nga policia e Shkodrës. Shkak është bërë pikërisht pikasja e makinës së Bajrit jo larg vendit ku u qëllua makina tip Audi në Bushat, pas atentatit të dështuar. Pikërisht, për këtë arsye ai është shoqëruar fillimisht në policinë e Lezhës dhe më pas në atë të Shkodrës për të dhënë dëshminë e tij në lidhje me praninë në aksin Bushat-Shkodër pas incidentit me armë. Pas marrjes së deklarimeve, mësohet se Safet Bajri është lënë i lirë nga policia. Kjo e fundit duket krejt hermetike në lidhje me detajet e hetimit mbi ngjarjen e 23 gushtit dhe shënjestrës së këtij atentati. Burime pranë policisë së Shkodrës i thanë Versus.al se janë në rrugë të mbarë për zbardhjen e plotë të kësaj ngjarje. Ndërkohë Versus.Al ka mësuar ekskluzivisht se ditët e fundit janë sekuestuar nga ana policisë së Shkodrës 3 automjete të blindura, të cilat ishin në qarkullim në qytet. / Versus.al
