Emigrimi masiv i shqiptarëve ka sjellë mungesë të krahut të punës në profesione të ndryshme. Për të mbushur këtë boshllëk të krijuar, qeveria ka vendosur të lehtësojë procedurat për të marrë staf nga vende aziatike apo afrikane.
Me ndryshimet e propozuara nga ligjin për të huajt të miratuar në vitin 2021, qeverisë i jepet e drejta të lidhë marrëveshje me shtete të tjera për të marrë punonjës në varësi të kërkesave të tregut.
Sipas Shqiptarja.com, qeveria është në negociata me Filipinet për të marrë 40 mijë punonjës të kualifikuar për sektorin e turizmit dhe industrisë përpunuese dhe ka nisur negociatat me Indonezinë.
Projektligji i kaluar në mbledhjen e fundit të qeverisë lehtëson procedurat e aplikimit për të huajt që duan të punësohen në vend. Madje është hequr edhe kushti që kishin të huajt për të depozituar një shumë parash në llogarinë bankare si garanci financiare.
Për të aplikuar për vizë tashmë mjafton të vërtetosh që ke të ardhura të mjaftueshme financiare për të përballuar jetesën nëpërmjet një dokumenti bankar.
Gjithashtu janë përcaktuar edhe detaje të tjera sa i takon lejeve unike të punësimit që kanë kohëzgjatje aq sa është kontrata e punës. Në projektligj thuhet se lejet do të bazohen në nevojat e tregut, dhe vetëm pasi punëdhënësi në Shqipëri ka tentuar të punësojë fillimisht të papunët në vend, të huaj që janë anëtar të familjeve shqiptare, shtetas nga SHBA, nga shtete të BE, apo nga vendet fqinje të Bosnjë-Hercegovinës, Malit të Zi, Kosovës, Serbisë dhe Maqedonisë së Veriut.
“Kartat Blu AL” do të jepen vetëm për punonjësit me kualifikim të lartë për një periudhë 2 vjeçare. Ndërsa për shtetasit e vendeve të BE, rregullat janë më të lehta pasi kanë të drejtën e qëndrimit në vend pa pasur nevojë për leje unike edhe për më shumë se 3 muaj në rastin kur janë të punësuar, apo kanë të ardhura të mjaftueshme për veten dhe anëtarët e familjes së tyre.
Kur një i huaj vjen në vend për të punuar, ai mund të marrë edhe familjen e tij, dhe nëse anëtarët e familjes nuk janë shtetas të BE mund të qëndrojnë pasi të pajisen me “Kartë qëndrimi të një anëtari të familjes së një shtetasi të BE-së”. Karta është e vlefshme 5 vjet.
Aktualisht në Shqipëri punojnë më shumë se 9 mijë të huaj, kryesisht në turizëm, ndërtim dhe tregtinë me shumicë. Shifrat zyrtare tregojnë se interesi më i lartë për të punuar në Shqipëri është i shtetasve nga Turqia, Bangladeshi, India dhe Nepali. Versus.al
