Prokuroria e Shkodrës ka shpallur moskompetencë për hetimin e masakrës së ndodhur pasditen e 30 tetorit në Dobraç ku mbetën të vdekur në total 4 persona, Hamza Lici dhe Arlind Bushati të cilët u qëlluan me breshëri dhe bashkëshortët Bashkim dhe Flutura Basha të cilët po kalonin rastësisht kur u përplasën nga makina e “shënjestrave”.
Tashmë çështja do të hetohet nga Prokuroria e Posaçme (SPAK) pasi dyshohet se atentati është planifikuar dhe kryer nga një grup i strukturuar kriminal.
Për ngjarjen janë shpallur në kërkim Izmir Sakica dhe Samuel Troshani të cilët njihen si anëtarë të grupit të Bajrajve në Shkodër. Policia mori në pyetje kreun e grupit “Bajri” Safet Bajrin si një prej të dyshuarve për ngjarjen, por ky i fundit argumentoi se ka qenë me familjarët në momentin kur ka ndodhur atentati, duke u paraqitur si provë edhe pamje filmike të tij brenda banesës.
Ndërkohë, përveç kontrolleve për kapjen e autorëve që dyshohet të kenë qenë 3 persona të cilët sulmuan me mjetin “Range Rover” dhe më pas një i katërt i mori nga vendi ku u dogj mjeti, policia po kontrollon edhe për kapjen e personit “misterioz” të shfaqur pas masakrës.
Mediat raportuan se ka dyshime që personi të jetë vetë i shumëkërkuari Ibrahim Lici i cili dyshohej se ndodhej në Turqi. Raportohet se Lici mund të jetë i plagosur dhe dyshimet janë që po trajtohet në një klinikë mjekësore private në jug të vendit. Deri më tani kontrolle janë kryer në Fier dhe Vlorë, por pa rezultat. Versus.al
