Shkodër- Disa persona, anëtarë të grupit Bajri janë shpallur në kërkim nga policia për masakrën e Dobraçit të ndodhur pasditen e 30 tetorit ku mbetën të vdekur Hamza Lici, Arlind Bushati dhe Flutura Basha e cila po kalonte rastësisht me bashkëshortin e saj në momentin kur ndodhi ngjarja.
Mes të shpallurve në kërkim janë Izmir Sakica dhe Samuel Troshani.
Më herët, Sakica dhe Troshani janë përfshirë në një përplasje me armë zjarri me dy vëllezërit Andrea dhe Sandër Prendi për një borxh të pakthyer. Ngjarja ndodhi gushtin e këtij viti kur Sakica dhe Troshani të cilët po qarkullonin me automjet të blinduar, u qëlluan me armë zjarri nga njëri prej vëllezërve Prendi i cili po qarkullonte me motor ndërsa tjetri ishte në një mjet tip “BMW” ku gjithashtu u gjetën shenja plumbash, duke lënë të kuptohet se ka pasur shkëmbim zjarri mes grupeve, por fatmirësisht pa viktima.
Ndërkohë, policia po bën ekspertizën e gjurmëve në armët e zjarrit të gjetura në masakrën e Dobraçit, për të përcaktuar nëse personi i tretë që dyshohet të ketë qenë në makinë me viktima Hamza Lici e Arlind Bushati, ka qenë i shumëkërkuari Ibrahim Lici.
Për ngjarjen kriminale u shoqëruan në polici 20 persona, mes të cilëve edhe Safet Bajri, i njohur si kreu i klanit Bajri. Ai tha para policisë se nuk kishte lidhje me krimin dhe se në momentin kur ka ndodhur ngjarja, ka qenë në shtëpinë e tij. Autorët të cilët kryen atentatin mafioz dyshohet të kenë qenë vrasës me pagesë nga Mali i Zi. Tre prej tyre kanë qenë në makinën “Range Rover”, njëri drejtonte mjetin ndërsa dy të tjerët hapën zjarr me kallashikov për 200 metra rresht ndaj mjetit që drejtohej nga Hamza Licit. Ky i fundit nuk arriti t’u kundërpërgjigjej, ndërsa Arlind Bushati qëlloi drejt autorëve, por mbeti i plagosur rëndë dhe më pas ndërroi jetë në spital. Në pamjet e publikuara pas atentatit, shihet se një person i tretë mund të ketë qenë në makinën e viktimave, por më pas është larguar pa lënë gjurmë. Policia po punon edhe për identifikimin dhe kapjen e tij ndërsa ngjarja e ndodhur pritet të sjellë pasoja dhe përplasje të tjera mes bandave. Versus.al
