Maskara e Dobraçit me tre viktima i ka trembur mjaft shkodranët, të cilët duket se dinë mirë se kush janë autorët, edhe pse institucionet e shtetit nuk kanë siguruar ende prova.
Për shkak të masakrës, ku humbi jetën edhe një qytetare e pafajshme, ishte paralajmëruar një protestë-homazh sot në orën 18:00 në Shkodër.
Por duket se për shkak të pasigurisë dhe frikës askush nuk ka dalë të protestojë.
"Qyteti e di kush vret, por Shkodra nuk flet", është kjo një shprehje që përsëritet pas çdo ngjarje kriminale, të cilat fatkeqësisht po bëhen të shpeshta dhe po tronditin opinionin publik duke marrë edhe jetë të pafajshme. Kryeqendra e veriut e di mirë këtë.
Dje vdiq Flutura e pafajshme, por një vit më parë ishte Musaeni. Krimi nuk po kursen askënd.
Persona ende të paidentifikuar i bënë atentat Hamza Licit dhe Arlind Bushatit, ndërsa në këtë ngjarje të rëndë, gjeti vdekjen dhe qytetarja e pafajshme Flutura Basha.
Bashkëshorti i saj, Bashkim Basha ndodhet në spital në gjendje të rëndë.
