Ka ndërruar jetë Arlind Bushati, i cili mbeti i plagosur rëndë në atentatin e ndodhur pasditen e sotme në Dobraç të Shkodrës.
Bushati ishte në gjendje të rëndë dhe nuk ka mundur ti mbijetojë plumbit që kishte marrë në kokë.
Arlind Bushati, djali i biznesmenit dhe ish-kandidatit për kryebashkiak të Shkodrës, Xhemali Bushati ndërroi jetë rreth orës 22:00 në spitalin e Shkodrës. Ai ishte bashkë me Hamza Licin, në makinën ‘Benz’ me targa kroate kur ra pre e plumbave të atentatorëve.
Në një njoftim të mbrëmjes nga policia, u bë e ditur se në total në dy skenat e krimit, janë gjetur 5 armë, 3 pistoleta që janë gjetur në “Benz-in” që drejtonte Hamza Lici dhe dy kallashnikov në “Range Rover-in” e djegur në Golem.
“Në vijim të informacionit të dhënë më parë për ngjarjen e ndodhur në aksin rrugor “Shkodër-Koplik”, në Dobraç, ju informojmë se:
Nga kontrolli i ushtruar në automjetin që udhëtonin Ibrahim Lici dhe Arlind Bushati, u gjetën 3 armë zjarri (pistoleta).
Ndërkohë shërbimet e Policisë gjatë kontrollit të zonës për kapjen e autorëve, në fshatin Golem kanë konstatuar të djegur plotësisht një automjet tip “Range Rover” dhe 2 armë zjarri automatike.
Grupi i posaçëm hetimor në drejtimin e Prokurorisë së Shkodrës, po vijon punën për zbardhjen e rrethanave, sigurimin e provave me qëllim dokumentimin ligjor të ngjarjes, identifikimin dhe kapjen e autorëve”, thuhet në informacionin shtesë të policisë.
Nga të shtënat e ndodhura pak para orës 16:00 mbeti i vrarë Hamza Lici dhe Flutura Basha. Ndërsa u plagosën rëndë Arlind Bushati i cili humbi jeten ne mbremje dhe Bashkim Basha, i cili vijon te jete rende.
