Britani e Madhe- Një 30 vjeçar shqiptar i identifikuar si Elidjan Aliaj është dënuar me 8 muaj burg që iu konvertua në 18 muaj shërbim prove nën akuzën e mashtrimit në testin për të marrë patentën britanike.
Për dënimin gjyqtari, James House pati edhe një vërejtje, duke deklaruar se shqiptari e meritonte të dënohej më shumë, gjë që sipas tij në këto kushte është e pamundur pasi burgjet janë të tejmbushura.
“E meriton të shkojë në burg, por i kam duart e lidhua sepse burgjet e mbretit janë plot gati për të shpërthyer”- u shpreh gjyqtari në seancë.
Nga ana tjetër, Aliaj i cili mori patentën në gusht të vitit 2022, pranoi 3 akuza për mashtrim. Ai pagoi një person që të jepte provimet në vendin e tij duke u shtirur si ai për të siguruar kalimin në testin teorik dhe praktik.
Nga ana tjetër, personi që mori pagesën është larguar nga vendi pas akuzave që rëndonin ndaj tij.
Burgjet në Britaninë e Madhe po përballen me një tejmbushje të të dënuarve dhe paraburgosurve për krime të ndryshme të cilat janë shtuar në vitet e fundit. Të burgosurit dhe të dënuarit shqiptarë, mësohet se përbëjnë një përqindje të madhe. Për këtë arsye, qeveria shqiptare dhe ajo britanike firmosën marrëveshjen e ekstradimit të disa prej të dënuarve që këta të fundit ta kryenin dënimin në qelitë e burgjeve shqiptare. Versus.al
