Është arrestuar një tjetër bashkëpunëtor i përfshirë në skemën e mashtrimit të një biznesmeni nga Lushnja. Në pranga ka rënë Arsen Matollari, ndërsa policia ka konfiskuar 4700 euro dhe automjetin që përdorej nga të dyshuarit.
Përmes kontrollit të vazhdueshëm dhe përdorimit të inteligjencës policore, shërbimet e Komisariatit të Policisë Nr. 6, në kuadër të operacionit me emrin “Unknown”, arritën të kapin dhe ndalojnë Arsen Matollarin, 32 vjeç, banor në Durrës.
''Ky shtetas në bashkëpunim me shtetasin Ervis Belollari (i arrestuar ditën e djeshme) kanë përfituar 6000 euro nga një biznesmen, duke iu prezantuar atij si përfaqësues të drejtuesit të një institucioni vendor.
Në vijim të veprimeve, gjatë kontrollit të banesës së shtetasit A. M., shërbimet e Policisë gjetën 4700 euro të cilët u sekuestruan në cilësinë e provës materiale sëbashku me automjetin me të cilin këta shtetas lëviznin.' thuhej në njoftimin e policisë.
Si e kryenin mashtrimin Arsen Matollari dhe Ervis Belollari?
Ervis Belollari dhe Arsen Matollari u paraqitën si zyrtarë lokalë për të marrë para nga një biznesmen i specializuar në bimë medicinale nga Lushnja. Belollari, i cili u arrestua një ditë më parë, fillimisht i mori biznesmenit 6 mijë euro, duke u dukur si kryetar i një bashkie ose si zyrtar lokal, pa specifikuar emrin e institucionit.
Kur biznesmeni kuptoi se ishte mashtruar, ai raportoi rastin në polici. Sipas tij, të dyshuarit i thanë se kishin një problem shëndetësor në një spital privat në Tiranë dhe kishin nevojë për para. Megjithatë, mashtruesit nuk u kënaqën me këtë shumë dhe kërkuan edhe 7 mijë euro të tjera. Pas ankesës së biznesmenit, policia filloi hetimet./Versus.al
