Pas ngjarjeve të fundit tronditëse në kryeqytet dhe rrethe, ministri i ri i Brendshëm Ervin Hoxha ka paralajmëruar reformim të strukturave të policisë.
Në një qëndrim të bërë publik në rrjete sociale, Hoxha ka theksuar:
“Të qarkullosh me armë zjarri në rrugë, qendra të banuara e kudo, për qëllime kriminale, siç ka ndodhur ditët e fundit apo edhe sot në Malësinë e Madhe, nuk është thjesht një këmbanë alarmi, por na vendos përballë një detyre të madhe: Për të gjetur mekanizmat e menjëhershëm për kontroll më të mirë e më efikas të territorit, për tê siguruar informacionin e duhur, me qëllim parandalimin. E nga ana tjetër dhe po me kaq rëndësi, për të ndryshuar dhe reformuar organizatën e Policisë, nga qendra në bazë", - thekson ministri i Brendshëm.
Nga ana e tij ai premton se do të mbështesë maksimalisht dhe pa asnjë hezitim të gjitha strukturat e Policisë së Shtetit, siç po përballet sot Policia e Shkodrës në luftën e saj kundër kultivimit të kanabisit apo Policia e Shtetit në përballjen e saj me krimin në çdo cep të vendit.
