Partia Demokratike ka paralajmëruar bllokimin e akseve kryesore të vendit ditën e nesërme në kuadër të ndjekjes së planit për mosbindje civile deri në krijimin e një qeverie teknike.
Lidhur me akset të cilat pritet të bllokohen nesër nga ana e protestuesve të PD, policia ka publikuar një plan masash për protestën që pritet të nisë nga ora 17:00 dhe planifikohet të zgjasë për tre orë rresht.
30 minuta para nisjes, policia rrugore do të jetë e dislokuar në këto akse:
Segmenti Casa Italia – Sheshi “Shqiponja”
Rrethrrotullimi Milot
Rrethrrotullimi Shkozet
Rrethrrotullimi Bradashesh
Rrethrrotullimi Rrogozhinë
Rrethrrotullimi Levan
Pothuasje e gjithë policia rrugore do të jetë në terren me qëllim kontrollimin e lëvizjeve të automjeteve që të mos ketë bllokim të rrugëve. Po ashtu në terren do të jenë edhe efektivë të forcave të rendit, Shqiponja dhe FNSH për mbarëvajtjen e rendit dhe sigurisë.
Kjo është protesta e dytë e organizuar nga PD pas asaj të 6 tetorit e cila u cilësua si nisje e mosbindjes civile. Qytetarët pjesëmarrës në protestë marshuan përballë institucioneve kryesore të vendit ku hodhën edhe lëndë plasëse molotov, për të cilat u arrestuan disa prej tyre, për t’u poceduar penalisht më pas.
Ndërkohë, sot aksioni i Partisë Demokratike pritet të vijojë në sallën plenare dhe jashtë Kuvendit ku zhvillohet seanca e radhës. Pritet që përplasja të vazhdojë ashtu si në seancën plenare të 17 tetorit ku deputetëve të cilët po pèrplaseshin me FNSH dhe gardën jashtë Kuvendit, iu bashkuan edhe protestuesit e mbledhur para bashkisë së Tiranës. Versus.al
