Pensionistët kanë mbajtur sot një deklaratë për mediat para godinës së kryeministrisë ku kanë paralajmëruar për mbajtjen e protestës së tretë të tyre, ditën e nesërme në orën 10:00.
Një prej tyre teksa foli para mediave duke ironizuar edhe takimet që kryeministri po bën prej ditësh me pensionistë në qytete të ndryshme të vendit. I moshuari tha se kreu i qeverisë nuk po merret me problemin, por po nxit përçarje brenda pensionistëve duke marrë në takim persona të cilët vetëm e lavdërojnë.
“Duke thirrur disa dordoleca që heshtin dhe e lavdërojnë, ai ka bërë një përçarje. U bëj thirrje këtyre dordolecave të tjerë që rrinë nëpër lagje duke lozur domino, të dalin nesër këtu, se ne edhe për ta po luftojmë e protestojmë. I ftoj edhe të rinjtë studentët të vijnë të mbështesin prindërit, gjyshërit apo të afërmit sepse ky diktator nuk merr vesh me fjalë, ky do masivitet.
Nëse në 2 protestash kanë dalë me mbi 500 pensionistë për shkak të gjendjes shëndetësore, ata janë të barabartë me 500 mijë patronazhistë. Ejani nesër të protestojmë kundër këtij njeriu, ky mendon se ne do lodhemi por jo. Nuk dorëzohemi sepse ky diktator i pamëshirshëm na ka përbuzur”- u shpreh pensionisti ndër të tjera.
Nga ana tjetër, në një takim që pati me pensionistët e Korçës, Rama ironizoi protestat para kryeministrisë, duke ‘shënjestruar’ kreun e Lëvizjes Bashkë, Arlind Qori si organizator të protestave të cilin e quajti “Sudja me gjyslyke”. Në turin e tij nëpër qytete, Rama u ka argumentuar pensionistëve vështirësitë për rritjen e pensioneve, duke nënvizuar si shkak kryesor mosdeklarimin e pagave reale në bizneset e vendit. Versus.al
