I shumëkërkuari Ibrahim Lici dyshohet se është personi misterioz i cili shfaqet në videon ku tregohet vendngjarja e masakrës së Dobraçit e ndodhur më 30 tetor. I njohur me pseudonimin “fantazma” ai prej shumë kohësh ka arritur t’i shpëtojë policisë.
Sa i takon faktit që Lici është ende në kërkim prej vitesh, drejtori i Krimeve të Rënda, Ervin Hodaj u shpreh se i riu rezulton me kartelë shumë të kuqe nga policia shqiptare për shkak të rrezikshmërisë së tij. Ndërsa shtoi se Lici është arrestuar më herët dhe të njëjtën gjë policia mund ta bëjë sërish.
“Ibrahim Lici u kap nga policia shqiptare dhe dua ta theksoj këtë. U kap nga 2023 falë punës së Drejtorisë Vendore të Policisë së Shkodrës, informacioneve që kishte, Departamentit të Policisë Kriminale dhe Interpol Tiranës. Ka dërguar informacionin e saktë, me adresë të saktë të këtij personi në kërkim në Turqi dhe u bë kapja e tij. U arrestua nga autoritetet turke. Pavarësisht procedurave, autoritetet e lanë me arrest shtëpie dhe nuk e lanë me arrest në burg. Pas kësaj autoritetet turke e kanë kërkuar në banesën që ai e ka lënë për rezidencë dhe nuk e kanë gjetur, pra ai është arratisur. Sigurisht që ne përsëri do vazhdojmë për ta kapur Ibrahim Licin. Dhe jo vetëm atë, por të gjithë personat e kërkuar. Për t’i kthyer përgjigje pyetjes së Glidonës se ku është? Ne e kemi kapur Ibrahim Licin, pra policia shqiptare e ka kapur në bashkëpunim me partnerët dhe përsëri do ta kapim. Kjo është detyra jonë në fund të ditës”, tha Hodaj.
Për masakrën e ndodhur më 30 tetor në Dobraç të Shkodrës, drejtori i përgjithshëm i policisë, Ilir Proda u shpreh se shumë shpejt do të ketë rezultate konkrete për autorët e dyshuar. Versus.al
