Në ceremoninë e kësaj të enjte, të mbajtur për nderimin e jetës dhe veprës së Kryepiskopit Janullatos, Papa Françesku dërgoi një letër të veçantë, e cila u lexua gjatë ceremonisë nga një përfaqësues i lartë i Vatikanit. Në këtë mesazh, Papa Françesku kujtoi takimet e tij me të ndjerin dhe vlerësoi angazhimin e tij të palodhur për unitetin e Kishës dhe dialogun ndër-fetar.
“Janullatos ishte një burim frymëzimi për të gjithë ne. Me një zemër të hapur dhe një shpirt bashkëpunues, ai punoi pa pushim për të ndërtuar urime të forta midis Kishës Ortodokse dhe Kishës Katolike, duke promovuar paqen dhe mirëkuptimin midis të gjithë besimtarëve,” tha Papa Françesku në letrën e tij.
Papa Françesku theksoi gjithashtu se Kryepiskopi nuk humbi kurrë synimin e tij për të depërtuar në thellësitë e zemrave të besimtarëve, duke respektuar traditat dhe identitetin e tyre, por gjithmonë duke kërkuar mënyra për të forcuar lidhjet me Kishat e tjera dhe komunitetet fetare. “Ai ishte një shembull i vërtetë i dashurisë dhe unitetit, duke treguar se si mund të jetojmë së bashku në harmoni, pavarësisht nga ndryshimet tona,” shtoi Papa.
Anastas Janullatos u njoh gjithashtu për kontributin e tij të madh në dialogun ekumenik dhe për përpjekjet e tij për të promovuar një bashkëjetesë paqësore midis të gjithë besimtarëve. Ai ishte një zë i fuqishëm për tolerancën dhe mirëkuptimin, duke ndikuar jo vetëm në komunitetin ortodoks, por edhe në ato të tjera fetare.
Në përfundim të letrës, Papa Françesku u lut për prehjen e shpirtit të Fortlumturisë dhe nxiti të gjithë besimtarët të ndjekin shembullin e tij në ndërtimin e një bote më të paqshme dhe të bashkuar.
Letra e Papës, lexuar gjatë funeralit
Pikërisht sot, Papa Françesku i shkruan mitropolitit të Korçës, Hirësisë së tij Joanit, i cili kryen aktualisht funksionet e nevojshme për të çuar përpara jetën e Kishës Ortodokse Shqiptare, derisa të mblidhet Sinodi i saj, i cili, 40 ditë pas vdekjes së kryepiskopit Anastas, do të zgjedhë kreun e ri. Atij, Sinodit, klerit dhe gjithë besimtarëve ortodoksë, Ati i Shenjtë Françesku u shpreh ngushëllimet për humbjen e kryepiskopit të Tiranës, Durrësit dhe të gjithë Shqipërisë, duke u siguruar lutjet që Zoti, Ati ynë i mëshirshëm, ta vlerësojë për punën e lodhjen.
“Feja e bashkësisë ortodokse shqiptare – shkruan Papa Françesku, në mesazhin e lexuar gjatë funeralit nga imzot Flavio Pace – sigurisht që u mishërua në jetën e vëllait tonë të dashur, shërbimi baritor i zellshëm i të cilit i ndihmoi njerëzit ta rizbulonin pasurinë dhe bukurinë e saj, pas vitesh ateizmi të imponuar nga shteti dhe pas persekutimit. Për këtë, ruaj kujtime të bukura nga takimi im me Fortlumturinë e Tij, me rastin e udhëtimit tim të parë apostolik jashtë Italisë, si edhe janë të dashura për mua përqafimi vëllazëror dhe fjalët e shkëmbyera me atë rast.
Gjatë gjithë jetës së tij të gjatë dhe shërbesës së tij si prift dhe peshkop – vijon Ati i Shenjtë – ai tregoi gjithmonë një përkushtim të thellë ndaj Ungjillit, duke i shërbyer dhe duke e shpallur Zotin në kontekste të ndryshme gjeografike dhe kulturore, në Greqi, Afrikë dhe Shqipëri. E bëri këtë, duke ndjekur shembullin e Shën Palit apostull, i cili iu përkushtua aq shumë Krishtit sa mundi të thoshte: “Për të gjithë u bëra gjithçka, që, të kushtojë sa të kushtojë, por ta shpëtoj ndonjërin” (1 Kor 9, 22).
Duke marrë përsipër përgjegjësinë e udhëheqjes së Kishës Ortodokse Shqiptare, deshi të depërtonte në thellësitë e zemrave të besimtarëve, veçanërisht në traditën dhe identitetin e tyre, pa e humbur asnjëherë bashkimin me Kishat e tjera Ortodokse. Njëkohësisht, u impenjua me vullnet të mirë në dialog dhe promovoi bashkëjetesën paqësore me Kishat dhe fetë e tjera.
Kur mbërriti në Shqipëri – thuhet në mesazhin e Atit të Shenjtë – disa priftërinj e pritën me urimin e Pashkëve në greqisht “Christos Anesti!”. Ai u përgjigj shqip, duke shprehur dëshirën e tij të zjarrtë për të jetuar me popullin dhe për të dëshmuar dashurinë e Zotit, e cila mposht çdo errësirë dhe shtypje, mes atyre që kishin vuajtur shumë.
Tani që jeta e tij tokësore arriti në fundin e saj – e mbyll Papa letrën, që mban datën e 27 janarit – lutem që, me mëshirën e Zotit, Atit të Gjithëpushtetshëm, Fortlumturia e Tij ta lëvdojë në amshim Trininë Shenjte, së bashku me të gjithë dëshmitarët e fesë , që u kanë shpallur fjalën e shpëtimit popujve, kudo dhe në çdo kohë”./Versus.al/
