Vetëm pesë vende të NATO-s, përfshirë Shqipërinë, kanë dalë publikisht në mbështetje të ofensivës ushtarake të SHBA-së dhe Izraelit ndaj Iranit, sipas një raporti të Forbes. Shumica e anëtarëve të tjerë të aleancës kanë mbajtur qëndrim neutral ose kritik ndaj operacionit, duke e vështirësuar për presidentin Donald Trump sigurimin e mbështetjes së koalicionit.
Përveç Shqipërisë, vendet që kanë shprehur mbështetje janë Maqedonia e Veriut, Lituania, Letonia dhe Republika Çeke, ndërsa mbështetje ka shfaqur edhe Kosova, e cila nuk është anëtare e NATO-s, por ka baza të saj ushtarake. Këto vende lidhin qëndrimin me shqetësimet për programin bërthamor iranian, kërcënimet ndaj stabilitetit rajonal dhe aktivitetet e Iranit kundër aleatëve të tyre.
Kryeministri shqiptar Edi Rama e lidhi këtë qëndrim me tensionet e mëparshme diplomatike me Iranin dhe në një postim në rrjetin X më 28 shkurt theksoi: “Ne mbështesim Shtetet e Bashkuara në mbështetjen ushtarake të Izraelit sot, nën udhëheqjen e presidentit Donald Trump”, duke dënuar gjithashtu “agresionet kibernetike” të Iranit ndaj Shqipërisë, që çuan në ndërprerjen e marrëdhënieve diplomatike në 2022.
Edhe Presidentja e Kosovës, Vjosa Osmani, shprehu mbështetje për veprimet e SHBA-ve dhe aleatëve të tjerë, duke thënë se synimi është të japë fund regjimit iranian dhe të sjellë lirinë dhe paqen për popullin e Iranit.
Forbes nënvizon se mbështetja e Shqipërisë dhe e vendeve të tjera të vogla e vendos vendin në një pozicion të qartë pro-SHBA-ve dhe Izraelit, duke reflektuar angazhimin e saj ndaj sigurisë dhe stabilitetit rajonal, ndërsa shumica e vendeve të tjera të NATO-s, përfshirë Danimarkën, Finlandën dhe Luksemburgun, kanë mbajtur qëndrim neutral.
Disa vende, si Italia dhe Spanja, janë shprehur kritikisht ndaj operacionit, duke theksuar pasojat humanitare dhe rreziqet për stabilitetin ndërkombëtar./Versus.al
