Gjykata e Posaçme ka urdhëruar Prokurorinë e Posaçme (SPAK) që të regjistrojë kallëzimin penal të bërë nga Fredi Beleri dhe të nisë hetimin ndaj Olta Xhaçkës dhe burrit të saj Artan Gaçi për akuzat e shpërdorimit të detyrës, falsifikimit të dokumenteve dhe pastrimit të produkteve të veprës penale kryer në bashkëpunim.
Beleri kishte ankimuar vendimin e SPAK për të mos filluar hetimet ndaj çiftit të bashkëshortëve.
Në njoftim thuhet se kallëzimi i bërë nga Beleri për Xhaçkën dhe Gaçin është i bazuar në ligj.
“Në rastin konkret, Prokuroria e Posaçme duhet të regjistrojë procedim penal dhe të vazhdojë hetimet, mbi parashtrimet në kallëzimin e regjistruar me nr. 81/2023 se ish-Kryetari i Bashkisë së Himarës, Jorgo Goro, Këshilli i Qarkut Vlorë dhe ish-punonjësit e ZVRPP Vlorë, në bashkëpunim me njëri-tjetrin, kanë kryer veprime në lidhje me falsifikimin e dokumenteve zyrtarë, të cilat janë përdorur për regjistrimin e një pasurie të paluajtshme në pronësi të subjektit Foto Mëhilli, dhe kjo pasuri është tjetërsuar në favor të të tretëve, konkretisht të familjarëve të të kallëzuarës Olta Xhaçka, e cila në kohën e marrjes së këtyre vendimeve nga Këshilli i Ministrave, ka ushtruar detyrën shtetërore të Ministres së Mbrojtjes në atë kohë, dhe funksionin politik të deputetes”- thuhet në njoftimin e GJKKO.
Sipas gjykatës, Xhaçka me mos veprimet e saj, duke mos deklaruar konfliktin e interesit, ka përfituar të pasuri shtetërore në mënyrë të paligjshme.
“Kjo shtetase, nëpërmjet investimit strategjik në një pronë të falsifikuar, ka përfituar të drejtën e përdorimit falas të pasurive shtetërore për të cilën shtetas të zakonshëm paguajnë detyrimet tatimore, etj”, thuhet në njoftimin e GJKKO.
Më tej kërkohet që të administrohet i gjithë informacioni i nevojshëm për hetimin duke u bazuar edhe në intervista të dhëna, ku sipas të dhënave të deklaruara prej tyre, është pranuar krijimi i një shoqërie tregtare me ortakë fiktivë, me qëllim shmangien e konfliktit të interesit.
“Ndodhur në këto kushte. Prokuroria e Posaçme duhet te administrojë të gjithë praktiken e regjistrimit te shoqërive në pronësi të familjarëve të te kallëzuarës Olta Xhaçka, administrimin e praktikës së marrjes së statusit të investitorit strategjik të të kallëzuarit Artan Gaçi, administrimin e deklarimeve të të kallëzuarve në intervista që kanë dhënë publikisht nga të cilat rezultojnë që kanë pranuar krijimin e një shoqërie tregtare me ortake fiktive, kunatën e të kallëzuarës Olta Xhaçka, me qellim shmangien në dukje të konfliktit të interesit, deklarimet e te kallëzuarës Olta Xhaçka në të cilat pranon për dijeninë dhe dëshirën e saj për marrjen në përdorim pa shpërblim të plazhit publik, si dhe të kryejë veprime të tjera hetimore që do të dalin nga dinamika e hetimeve në mënyrë që kallëzimi i shtetasit Dhionisios Alfred Beleri, edhe për shtetasit Artan Gaçi, për kryerjen e veprës penale “Falsifikimi i dokumenteve” dhe Pastrimi produkteve të veprës penale” kryer në bashkëpunim të parashikuara nga nenet 186 dhe 287 të Kodit Penal dhe Olta Xhaçka, për kryerjen e veprës penale “Shpërdorimi i detyrës parashikuar nga neni 248 Kodi Penal, të ketë një vendimmarrje”, thuhet më tej në vendimin e GJKKO.
Çështja e mandatit të Xhaçkës shkoi deri në komisionin e Venecias pasi mazhoranca nuk pranoi ta dërgonte për shqyrtim në Gjykatën Kushtetuese, pavarësisht se pretendohej se deputetja, asokohe ministre ishte në pavlefshmëri të mandatit duke pasur konflikt interesi me bashkëshortin e saj, investitor strategjik. Versus.al
