Asnjë shofer nuk është konstatuar i dehur nga kontrollet e policisë gjatë 24 orëve të fundit në Tiranë.
Policia thotë se kishte targetuar veçanërisht shoferët e autobusëve, taksive dhe furgonave, duke kryer 167 teste alkooli në total, nga të cilat asnjë nuk ka rezultuar pozitive.
Njoftimi i Policisë:
Gjatë 24 orëve të fundit, një rëndësi e veçantë i është kushtuar kontrolleve të drejtuesve të automjeteve të transportit publik (autobusë, taxi, fugona) në kryeqytet.
Gjatë 48 orëve të fundit i janë nënshtruar testit të alkoolit, 167 drejtues të automjeteve të transportit publik, me qëllim për t’ju siguruar qytetarëve, një transport sa më të sigurt.
Policia rrugore e Tiranës, krahas punës për menaxhimin e trafikut dhe evidentimin e ndëshkimin e drejtuesve të automjeteve për shkelje të ndryshme të qarkullimit rrugor, në fokus të punës së përditshmërisë së saj ka pasur dhe ka rritjen e parametrave të sigurisë së jetës së qytetarëve që përdorin për të udhëtuar automjete të transportit publik.
Gjatë kontrolleve të kryera nuk është konstatuar asnjë drejtues automjeti i transportit publik nën ndikimin e alkoolit.
Kontrollet do të vijojnë edhe në vazhdimësi.
Policia Rrugore e Tiranës apelon sërish për respektimin e rregullave dhe fton qytetarët të denoncojnë çdo shkelje me qëllim ruajtjen e një mjedisi të sigurt për të gjithë përdoruesit e rrugës.
