Vitet e fundit, jemi njohur me shumë raste të biznesmenëve shqiptarë të cilët kanë qenë të suksesshëm jashtë vendit ku kanë qëndruar për vite në emigracion. Ndërsa së fundmi, ato që konsiderohen si “parajsa investimi”, vende si Dubai, po bëhen gjithnjë e më tërheqëse për investitorët e huaj pasi u jep mundësinë e taksave të ulëta ndaj shtetit.
Madje edhe individë të pasur në Shqipëri, po synojnë investimin në Emiratet e Bashkuara. Së fundmi, një prej kompanive më të mëdha të pasurive të patundshme në botë “Sobha Properties” synon që të joshë pasanikët shqiptarë që të investojnë në Dubai në sektorin e blerjes së pronave.
Siç thuhet në njoftim, më datat 1 dhe 2 tetor kompania me bazë në Dubai do të zhvillojë një takim në hotel Marriot në Tiranë ku do të ekspozojë pronat që ka për të shitur ku pasanikët shqiptarë mund të investojnë për t’i blerë duke nisur nga çmime prej 247 mijë eurosh.
“Zhvilluesi kryesor i Dubait, Sobha, po sjell një mundësi unike investimi në Shqipëri! Bashkohuni me ne në këtë vitrinë ekskluzive të pronave për të eksploruar një përzgjedhje të kuruar të pronave më luksoze të Dubait, të gjitha të disponueshme në një vend, me çmime që fillojnë nga vetëm 247 mijë €,” thuhet në njoftimin e eventit.
Joshja që u bëhet pasanikëve shqiptarë është përmendja e faktit që Dubai është vendi më i sigurt në botë kur bëhet fjalë për të investuar duke theksuar edhe taksimin zero të tyre.
Mirëpo, nuk dihet për cilin lloj pasanikësh bëhet ky event, duke parë se shqiptarët që më së shumti kanë zgjedhur të jetojnë në Dubai janë ata të cilët janë në kërkim ndërkombëtar për vepra të tilla si trafik droge, vrasje, trafik qeniesh njerëzore etj. Përzgjedhja e Dubait nga ana e tyre është bërë për shkak se vendi i Emirateve të Bashkuara, nuk ka marrëveshje ekstradimi dhe për këtë arsye edhe nëse kapen, është pothuajse e pamundur që bosët e krimit të ekstradohen në Shqipëri apo vendet e tjera ku kërkohen. Me përjashtim të Plarent Dervishajt dhe Julian Meçes, anëtarë të bandës së Durrësit, të cilët në fakt nuk u ekstraduan nga Dubai por u përzunë prej aty për shkak të një konflikti fizik që kishin pasur 10 ditë më parë me një person tjetër. Versus.al
