Shkodër- Gjatë orëve të mbrëmjes së djeshme, forcat “RENEA” kanë zhvilluar një tjetër operacion në zonën e Rrethinave me qëllim kapjen e Eljon Hatos, të njohur ndryshe si “ushtar” i biznesmenit të zhdukur, Ervis Martinaj.
Duke qenë se arrestimi i Hatos dështoi sërish, në polici janë shoqëruar 6 persona për t’u marrë në pyetje, mes të cilëve është edhe vëllai i Hatos.
Krahu i djathtë i Martinajt, ka qenë disa herë subjekt i kërkimeve nga forcat e policisë, por ende nuk është kapur. Nuk dihet ende nëse bëhet fjalë për dekonspirim të operacionit, apo i riu nuk ka qenë në banesë.
Eljon Hato u shpall në kërkim në 2023-it pas operacionit “Metamorfoza” që solli lëshimin e 15 urdhër-arresteve, mes tyre edhe biznesmeni Pëllumb Gjoka dhe ish-shefi i Operacionales Oltion Bitri i cili shfaqej në komunikimet e Sky Ecc teksa informonte grupet kriminale.
Biznesmeni Ervis Martinaj, i zhdukur prej gushtit të vitit 2022, ishte shfaqur me Eljon Haton në vitin 2018 në një lokal të zonës së ish-bllokut ku pas një përplasje me armë zjarri mbeti i vrarë truproja e tij Fabian Gaxha. Versus.al
