Gjykata e Posaçme ka kaluar për gjykim dosjen e aferës “5D”, por nuk ka pranuar kërkesën e të pandehurve për gjykim të shkurtuar.
Hetimet e SPAK përfunduan në dhjetor të vitit të kaluar, ndërsa më 14 shkurt të këtij viti u kalua për gjykim dosja ndaj dy ish-drejtorëve të bashkisë Tiranë, Redi Molla, Mariglen Qato si dhe 5 bashkëpunëtorëve të tyre të akuzuar për një skemë korrupsioni e pastrimi parash të kryer nëpërmjet kompanisë fiktive “5 D Konstruksion”.
Ndërkohë SPAK kërkon kohë për listën e dëshmitarëve dhe parashtrimin e provave. Seanca e radhës për këtë dosje, do të mbahet më 17 prill.
Sipas SPAK, i pandehuri Redi Molla në cilësinë e ish-drejtorit të përgjithshëm të UKT Mariglen Qato si ish-drejtor i departamentit mbështetës në bashki dh eish-kryeinspektorit të IKMT, kanë qenë pronarët “de facto” të kompanisë “5D Konstruksion sh.p.k” të cilën e kanë përdorur në mënyrë indirekte për të vjelë fondet publike të bashkisë Tiranë në mënyrë të paligjshme.
Gjatë kohës që Molla ka drejtuar UKT, shoqëria 5D Konstruksion sh.p.k. ka marrë pjesë dhe është shpallur fituese në shkelje të rregullave të prokurimit publik në 7 tendera. Nga ekspertimi i kryer, ka rezultuar se 5D ka përfituar më shumë se 192.7 milionë lekë nga 12 tendera të zhvilluara në mënyrë të kundërligjshme.
Gjithashtu të akuzuarit e tjerë, Taulant Tusha në cilësinë e drejtorit të përgjithshëm të Drejtorisë së Planifikimit të Punëve Publike dhe si zyrtarët e tjerë Enton Punavija, Julian Zanaj dhe Albanon Janku kanë favorizuar shoqërinë 5D në 3 tendera të bashkisë Tiranë duke e shpallur fituese pavarësisht parregullsive dhe shkeljes së rregullave të prokurimit publik. Versus.al
