Fotomontazh: Arnold Rrokaj dhe Zambak Gjoni

Personat që shihni në foto, janë dy të arrestuarit me urdhër të SPAK për sulmin e hakerimit ndaj kompjuterave të prokurorëve të posaçëm.

Arnold Rrokaj, dyshohet se është autori i sulmit për të cilin SPAK mohon që të ketë pasur ndërhyrje në dosjet hetimore. Rrokaj dyshohet se ka siguruar akses të paligjshëm në emailet e prokurorëve, ndërsa nuk kishte arritur të hynte në emailin e kreut të SPAK, Altin Dumanit.

Pasi ka marrë informacione nga emailet e tre prej prokrurorëve, Rrokaj i ka shpërndarë tek Zambak Gjonaj, ish-drejtori i burgut të Vlorës i cili gjithashtu është arrestuar pasi i ka shpërndarë informacionet tek persona të tjerë.

SPAK ka sekuestruar gjithë pajisjet e përdorura nga Rrokaj për të sulmuar kompjuterët e prokurorëve të SPAK, ndërsa po hetohet për personat e tjerë të përfshirë në këtë akt kriminal. Versus.al

Dje u bë publik lajmi për hakerimin e kompjuterave të Prokurorëve të Posaçëm më 12 mars të këtij viti. Pas raportimeve se disa hakera në Tiranë kishin arritur të hynin në kompjuterat e tre prej prokurorëve dhe kishin shpërndarë materiale hetimore, ka ardhur edhe reagimi nga SPAK ku bëhet me dije se hakerat nuk kanë arritur të ndërhyjnë në sistemin e brendshëm të IT.

Sipas SPAK, është ndërhyrë vetëm në adresat e emaileve të disa prokurorëve, por jo në sistemin e IT dhe hakerat nuk kanë pasur akses në dosje hetimore. Gjithashtu bëhet me dije se është tentuar të aksesohet adresa e emailit të Altin Dumanit, por pa sukses.

Në pranga për ngjarjen, kanë rënë Zambak Gjoni dhe Arnold Rrokaj të cilët u kanë shpërndarë materiale disa personave. SPAK u ka kërkuar këtyre të fundit që të ruajnë sekretin hetimor.

Njoftimi i plotë:

Prokuroria e Posaçme kundër Korrupsionit dhe Krimit të Organizuar mori informacion në datën 12 mars 2025 se ishte vënë në shënjestër të një ndërhyrje të paligjshme të adresave të email-eve të prokurorëve të posaçëm. Falë masave të sigurisë, nuk u arrit të ndërhyhej në sistemin e brendshëm të Strukturës së Posaçme kundër Korrupsionit dhe Krimit të Organizuar (SPAK), i cili mbetet i pacënuar.

Nga verifikimet, ka rezultuar se është ndërhyrë vetëm në adresat e e-maile-ve të disa prokurorëve, por jo në sistemin e përgjithshëm të IT-së të institucionit. Personat përgjegjës kanë arritur të marrin disa informacione, pa mundur të sigurojnë akses në dosje hetimore. Po ashtu, ata kanë tentuar të ndërhyjnë edhe në email-in e Drejtuesit të Prokurorisë së Posaçme, Z. Altin Dumani, por pa sukses.

Falë një hetimi intensiv të drejtuar nga Prokuroria e Posaçme, me përfshirjen e BKH-së si dhe Sektorit të Ekspertizës të kësaj Prokurorie u bë e mundur që të zbulohej kjo ndërhyrje e paligjshme, duke identifikuar dhe arrestuar brenda 24 orëve dy shtetas – individin që ka realizuar ndërhyrjen në e-mail-e dhe atë që ka shpërndarë informacionin tek persona të tretë. Gjithashtu u bë e mundur sekuestrimi i paisjeve të përdorura për të realizuar ndërhyrjen si edhe skedarët (file) e shkarkuar.

Prokurori i çështjes, me qëllim ruajtjen e sekretit hetimor, ka urdhëruar personat të cilët kanë rënë në posedim të këtyre informacioneve të mos i publikojnë ato. Ndërkohë, janë marrë në pyetje edhe individë të tjerë që mund të kenë pasur lidhje me personat e arrestuar dhe kanë poseduar informacionet.

Paralelisht me procedimin penal, Prokuroria e Posaçme nisi hetimin e brendshëm administrativ, i cili konfirmoi se  sistemi i përgjithshëm i IT-së nuk është cënuar. Njëkohësisht, janë marrë masa shtesë për forcimin e protokolleve mbrojtëse të sistemit të përgjithshëm të IT-së të institucionit.

Deri në këtë fazë të hetimit nuk ka asnjë të dhënë që personat e arrestuar të kenë bashkëpunuar me personel të brendshëm të SPAK.

SPAK siguron publikun dhe të gjitha palët e interesuara se janë marrë të gjitha masat për të mbrojtur dosjet, të dhënat e ndjeshme dhe për të ruajtur integritetin e infrastrukturës së  institucionit. 

Hetimet lidhur me këtë çështje vijojnë në kuadër të dyshimeve për ekzistencën e një grupi të strukturuar kriminal. Versus.al

Mbrëmjen e djeshme u publikua një skandal i ndodhur me hakerimin e kompjuterave të prokurorëve të SPAK nga të cilët u morën dosje hetimore të cilat u shpërndanë mes personave të ndryshëm.

Për skandalin u arrestuan dy persona të cilët dyshohen si përgjegjës për hakerimin. Ndërsa gazetarja Klodiana Lala zbuloi në emisionin "Opinion" se është ndërhyrë në kompjuterat e tre prej prokurorëve, ndërsa hakerimi i kompjuterit të Altin Dumanit, ka mbetur në tentativë.

“Është ndërhyrë në kompjuterin e prokurores Enkeleda Millonai, e cila kohët e fundit për arsye shëndetësore ka pasur momente që nuk është paraqitur në punë, në këtë moment është dhënë sinjali. Ka dyshime të forta për hakerim. Është ndërhyrë! Është parë që është ndërhyrë në 3 kompjutera, të Millonait, prokurores Elida Kaçkini dhe prokurorit Behar Dibra. Është tentuar të hakerohet kompjuteri i kreut të Prokurorisë së Posaçme Altin Dumani. Nuk është hakeruar dot, është vendosur të fiket gjithë sistemi, që të mos merreshin të dhëna të tjera”- u shpreh Lala.

Më tej gazetarja shtoi se përmes gjurmimit të celularëve prej ku janë shpërndarë dosjet e marra nga kompjuterët e prokurorëve të SPAK, është zbuluar se në Tiranë ekziston një zyrë hakerimi.

“Prokurorët përmes gjurmimit të celularëve kanë arrestuar në Kamzë Zambak Gjonin dhe më pas Arnold Rrokajn. Përmes gjurmimi të celularëve, ata kanë arritur të kuptojnë që hakerimi vinte nga një zyrë që ishtë në një nga kullat kryesore të Tiranës. Zyrë hakerimi! Ka dyshime që ka pasur edhe bashkëpunëtorë nga brenda. Kanë arritur përmes gjurmimit të celularëve, se kanë ndodhur brenda 24 orëve, kanë arritur të arrestojnë 2 personat. Janë ndaluar në flagrancë, u janë kapur celularët dhe u janë gjetur pajisje që përdoren për përgjim e hakerim. Dy janë sfidat kryesore, së pari kanë dalë të dhënat e një politikani, biznesmeni dhe një gruaje në administratë”, tha ajo.

Sipas saj, SPAK ka bërë mbledhje urgjente, ndërsa ka dyshime se këto dosje do të përdoreshin për shantazh në prag fushate. Versus.al