Gjykata e Posaçme po vazhdon seancën paraprake të dosjes së Sterilizimit, e cila ka nisur që prej orëve të para të mëngjesit të sotëm.
Fillimisht ka folur ish-zv/ministri i Shëndetësisë, Klodjan Rrjepaj sipas rendit të përcaktuar që në seancën e kaluar që u shty dhe më pas biznesmeni Ilir Rrapaj.
Avokati i ish-ministrit Beqaj mësohet se gjatë seancës i kërkoi trupës gjykuese që klienti i tij, të mbante shishe uji në sallë.
Por menjëherë pas kërkesës së avokatit të tij ka ndërhyrë ish-ministri i cili ka kritikuar kushtet duke i krahasuar ato me të Gjykatës së Hagës.
''Hashim Thaçi në sallë me kompjuter para, me tavoline dhe afër me avokatin. Ne këtu prapa xhamit, me shënime dore që flasim për tabela të studimit të fizibilitetit, pa tavolinë, pa kompjuter dhe pa pasur mundësinë të kemi afër avokatin” është shprehur ish-ministri.
Ish-ministri Beqaj është arrestuar për dosjen e fondeve të SASPAC me urdhër të SPAK-ut në muajin korrik, kur dhe GJKKO e la në burg, kurse për çështjen e Sterilizimit po ndiqet në gjendje të lirë. Në këtë dosje ka 8 persona nën akuzë, mes tyre edhe biznesmeni Ilir Rrapaj, teksa në muajin Mars të këtij viti SPAK e dërgoi dosjen e Sterilizimit për gjykim./Versus.al
