Gjatë një vizite në Pikën e Kalimit Kufitar Kakavijë, Ministri i Brendshëm, Ervin Hoxha, trajtoi shqetësimet e ngritura rreth shpërblimeve dhe orëve shtesë të papaguara për punonjësit e policisë.
Hoxha theksoi se Ministria e Brendshme ka përgatitur një propozim për të eliminuar kriteret që e kishin bërë të vështirë dhënien e shpërblimeve për efektivët e Policisë së Shtetit.
Pyetje: A jeni në dijeni të ankesave të efektivëve të policisë që ende nuk kanë marrë lekët e shpërblimit, ato për orët shtesë. Çfarë do të ndodhë për këta?
Ministri Hoxha: Ministria e Brendshme ka bërë një propozim për heqjen e kritereve dhe përjashtimit të Policisë së Shtetit sa i përket një kriteri i cili vitet e tjera nuk ka qenë i realizuar për shkak të buxhetit.
Unë besoj se të hënën, Këshilli i Ministrave do të miratojë aktin dhe projekt-vendimin, të cilin ne e kemi propozuar për dhënien e shpërblimit të punonjësve të Policisë së Shtetit.
Orët shtesë dhe orët suplementare janë të gjitha të parashikuara në Aktin Normativ, i cili është miratuar dhe të gjitha orët shtesë do të jepen sipas parashikimeve ligjore. Nuk ka asnjë keqkuptim e keqakordim të strukturave dhe të projekt-vendimeve të dala nga qeveria në raport me dhënien e shpërblimit dhe orëve suplementare të Policisë së Shtetit. Çdo gjë është sipas asaj që neve kemi thënë dhe çdo gjë do të ndodhë sipas këtyre vendimeve të parashikuara në ligjin përkatës./Versus.al
