Guardia di Finanza në Perugia ka kryer një aksion dhe ka konfiskuar një sasi të konsiderueshme droge, duke arrestuar një person të dyshuar për përfshirje në një rrjet të madh trafikimi droge që operonte në zonat e Spello-s, Foligno-s dhe rrethinat e provincës.
Policia ndaloi dhe kontrolloi një makinë që drejtohej nga një shtetas shqiptar në Spello, i cili kishte qenë objekt i hetimeve paraprake për lidhje me trafikun e drogës. Gjatë kontrollit të automjetit, i cili u ndal pranë një stacioni shërbimi në Foligno, u zbuluan dy hapësira të fshehura të krijuara në mënyrë të sofistikuar nën sediljet e pasme të makinës, të aksesueshme vetëm përmes një mekanizmi të veçantë hapjeje, që kishte si qëllim shmangien e kontrollit policor.
Në këto vende të fshehta, policia gjeti 10 blloqe kokaine me një peshë totale prej rreth 12 kilogramësh, si dhe 10 mijë euro, që besohet të jenë para të fituara nga trafikimi i drogës. Bazuar në këto prova, hetimet vazhduan me kontrollin e dy banesave që i përkisnin personit të arrestuar, të cilat ndodheshin në Spello dhe Foligno. Në këto kontrolle u zbuluan edhe 11 blloqe të tjera kokaine, me një peshë prej rreth 13 kilogramësh, një armë e vjedhur, 46 mijë euro para në dorë dhe disa telefona celularë, disa prej të cilëve ishin të koduar.
Vlera totale e drogës së konfiskuar llogaritet të jetë më shumë se 2.5 milionë euro në treg. Personi i arrestuar u dërgua në burgun e Spoletos, ku ndodhet në pritje të vendimeve të autoriteteve gjyqësore. /Versus.al/
