Këshilli i Ministrave ka miratuar vendimin për caktimin e kompanisë që do të marrë përsipër procesin e shenjimit dhe gjurmueshmërisë së bimës së kanabisit në Shqipëri, në kuadër të legjislacionit të ri për legalizimin e kontrolluar të kultivimit për qëllime mjekësore dhe industriale.
Sipas vendimit të miratuar me propozim të Ministrisë së Bujqësisë dhe Zhvillimit Rural dhe Ministrisë së Shëndetësisë dhe Mbrojtjes Sociale, kompania e përzgjedhur është “ALBTrace Co” sh.a.
Kjo shoqëri, e themeluar në mars të këtij viti, është një partneritet me kapital shqiptar dhe arab, dhe do të ketë rol qendror në sistemin e kontrollit të produkteve që burojnë nga bimët e kanabisit të kultivuara në përputhje me ligjin.
Detyrat e “ALBTrace Co” përfshijnë:
Prodhimin dhe shpërndarjen e pullave fiskale për produktet që i nënshtrohen akcizës, përfshirë ato të bazuara në kanabis;
Zbatimin e teknologjisë së gjurmueshmërisë që mundëson ndjekjen e produktit nga prodhimi deri te konsumi;
Ndihmën në garantimin e transparencës dhe parandalimin e abuzimeve me procesin e legalizuar të kultivimit.
Vendimi vjen në një moment kur Shqipëria është në procesin e zbatimit të ligjit për kanabisin mjekësor, dhe ku autoritetet kanë theksuar rëndësinë e kontrollit të plotë të zinxhirit të prodhimit për të shmangur devijimin drejt tregut të zi. /Versus.al
