Çështja e njohur si “Toyota Yaris” në 2018-ën, është rikthyer edhe njëherë në qendër të vëmendjes pas arrestimit të kryeprokurorit të Vlorës Aurel Zarka i cili dyshohet se kishte ndërhyrë disa herë në hetime për të lehtësuar pozitën e kushërinjve të tij të përfshirë.
Sipas gazetares Anila Hoxha SPAK po kryen mbledhjen e provave edhe për disa funksionarë të tjerë të drejtësisë të cilët në periudha të ndryshme kanë marrë para edhe për çështje të tjera nga 4 personat e akuzuar për dosjen “Toyota Yaris”.
Agjentë dhe hetues të BKH kanë kryer kontrolle dhe sekuestruar dosje jo vetëm në gjykata por edhe në prokurori ndërsa në arrest me burg ndodhet aktualisht Aurel Zarka i cili me një vendim të KLP të marrë ditën e djeshme u pezullua nga detyra e tij.
Ende nuk dihet se çfarë është sekuestruar gjatë kontrolleve por gazetarja Hoxha ka raportuar më tej se në fashikullin e dosjes njëri nga të dyshuarit rezulton të ketë fotografuar akte të dosjes ‘Toyota Yaris’ që ishte në atë kohë nën hetim nga ish prokurorë të krimeve të rënda, duke ua treguar palëve të përfshira.
E njëjta gjë përmendet në komunikime edhe për hetimin pasuror ndaj Suel Celës, një i shumë kërkuar nga SPAK. Për të thuhet se nuk do të ngrihej akuzë për pasurinë e tregut agroushqimor por vetëm për një automjet. Versus.al
