Tiranë- Është shtyrë seanca paraprake që ishte parashikuar të mbahej sot në GJKKO për ish-ministrin e Shëndetësisë Ilir Beqaj i cili akuzohet për shpërdorim detyre në dosjen e koncesionit të Sterilizimit.
Shkak për shtyrjen e seancës mësohet të ketë qenë mungesa e avokatit të Beqajt, Klodian Skënderi.
Tre ditë më parë, Beqaj doli nga SPAK me një valixhe të mbushur plot me dosjen e hetimeve për Sterilizimin. Ish-ministri pagoi faturën e caktuar nga SPAK prej 10 milionë lekësh për të marrë një kopje të dosjes së hetimeve për Sterilizimin të cilat siç shprehet ai, do t'i lexojë vetë.
Në 28 mars të këtij viti, SPAK mbylli hetimet për koncesionin e Sterilizimit duke iu kominikuar akuzat 8 personave të përfshirë, mes tyre zv.ministri Klodian Rrjepaj dhe biznesmeni Ilir Rrapaj të cilët ndodhen në paraburgim. Sipas SPAK, ka shkelje gjatë procesit të koncesionit të sterilizimit me vlerë 100 milionë euro dhe afat 10 vjeçar që u fitua nga biznesmeni Ilir Rrapaj. Ndërsa ish-ministri Beqaj akuzohet se ka shpërdoruar detyrën duke miratuar kontratën koncesionare në kundërshtim me ligjin. Versus.al
