Shkodër- Gjykata ka liruar katër policët të cilët u arrestuan ditë më parë nën akuzën e ‘shpërdorimit të detyrës’ pasi nuk shoqëruan në polici personin “misterioz” që në pamjet e publikuara shfaqet pranë viktimave të masakrës së Dobraçit.
Ndaj efektivëve Blerim Kurmekaj, Viktor Logu, Julian Sterkaj, Marte Martini, u caktua masa “detyrim paraqitje” dhe “ndalim i daljes jashtë shtetit” ndërsa hetimet ndaj tyre vijojnë për shpërdorim detyre. Në vendngjarje dyshohet se ka qenë i shumëkërkuari Ibrahim Lici, vëllai i viktimës Hamza Lici dhe dëshmitarë okularë në vendngjarje kanë thënë se ai ka tentuar ta mbajë në jetë 23 vjeçarin duke i bërë frymëmarrje artificiale.
Më herët është raportuar se janë zhvilluar kontrolle në disa klinika private në jug të vendit ku dyshohet se Ibrahim Lici mund të jetë duke u kuruar pasi në pamje duket se është plagosur. Deri më tani nuk ka asnjë shenjë të shumëkërkuarit i cili mendohej se ishte në Turqi dhe nëse ka qenë ai në masakrën e Dobraçit lind pikëpyetja si ka arritur të hyjë në vend duke mos u ndaluar në asnjë zonë kufitare.
Pas të shtënave me armë, makina ku po udhëtonte Lici dhe Bushati humbi kontrollin duke përplasur një motor ku udhëtonin burrë e grua, Flutura dhe Bashkim Basha, të cilët krejt rastësisht ndodheshin në momentin e atentatit, duke u kthyer për në shtëpi tek tre fëmijët e tyre. Flutura nuk u mbijetoi plagëve të marra nga përplasja dhe ndërroi jetë në vendngjarje, ndërsa Bashkimi humbi jetën pas disa ditësh në spital. Versus.al
