Marsela Pushani, 43 vjeçe, është liruar këtë të mërkurë nga burgu, pasi ka përfituar nga Amnistia Penale. Ajo ishte duke vuajtur dënimin për vrasjen e motrës së saj, Armanda Pushani, ngjarje e ndodhur në shtator të vitit 2023 në kryeqytet.
Krimi ndodhi më 2 shtator 2023 në banesën e familjes Pushani, në zonën mes Rrugës së Kavajës dhe Myslym Shyrit, ku dy motrat jetonin së bashku me nënën e tyre.
Sipas dosjes hetimore, konflikti mes dy motrave degradoi në përdorimin e një thike, me të cilën Marsela Pushani goditi motrën e saj 37-vjeçare, duke i shkaktuar plagë fatale.
Pas ngjarjes, nëna e tyre deklaroi para hetuesve se viktima ishte kthyer në banesë në gjendje të dehur dhe kishte kërcënuar familjarët me thikë. Sipas saj, gjatë përplasjes fizike, Marsela i mori thikën motrës dhe e goditi, duke pretenduar se veproi në kushtet e vetëmbrojtjes.
Pas përfitimit nga Amnistia Penale, 43-vjeçarja ka lënë ambientet e burgut, ndërsa ngjarja mbetet një nga rastet më të rënda të krimit brenda familjes të regjistruara në Tiranë./Versus.al
