Versus.al ka siguruar pamjet e vjedhjes së makinës Range Rover që u përdor në masakrën me 4 të vrarë në Dobraç të Shkodrës.
Automjeti u vodh, në lagjen nr.12 të qytetit të Durrësit, në orët e para të mëngjesit të 17 prillit, teksa ndodhej i parkuar në rrugë, pranë banesës së pronarit, një punonjës i forcës së sigurisë në Portin e Durrësit.
Sapo konstatoi vjedhjen, ai bëri menjëherë denoncim në polici, por pa rezultat. Në të njëjtën lagje, po atë ditë u vodh edhe një tjetër makinë e markës Range Rover.
Pas vrasjes së 4-fishtë të Shkodrës, ky Range Rover i vjedhur në Durrës u dogj me acid dhe u shkrumbua për të zhdukur çdo gjurmë të autorëve që u treguan të kujdesshëm për të mos lënë pas prova që mund të çojnë në identifikimin e tyre.
Atentati i 30 tetorit në Shkodër pati në shënjestër shtetasit Hamza Lici dhe Arlind Bushati, por pas të shtënave, automjeti i tyre humbi kontrollin dhe përplasi motorin, ku po udhëtonte çifti i bashkëshortëve Flutura dhe Bashkim Basha, të cilët u bënë viktima të pafajshme të kësaj ngjarjeje tragjike që ka tronditur thellë opinionin publik.
Autoritetet po vazhdojnë hetimet për të identifikuar dhe kapur autorët e këtij krimi të rëndë.
