Kryeministri i Izraelit, Benjamin Netanyahu, ka deklaruar se Shtetet e Bashkuara ishin të informuara paraprakisht për sulmin izraelit ndaj objektivave në Iran. Në një videomesazh të regjistruar, Netanyahu tha se vendi i tij kishte njoftuar Uashingtonin përpara se të ndërmerrte veprimet ushtarake.
“Po ua lë qëndrimin amerikan vetë amerikanëve. I informuam paraprakisht. Ata e dinin për sulmin. Çfarë do të bëjnë tani? Ia lë këtë Presidentit (Donald) Trump. Ai i merr vendimet e tij në mënyrë të pavarur,” deklaroi Netanyahu.
Ai shtoi se nuk dëshironte të fliste në emër të Presidentit Trump, duke theksuar: “Ai e bën këtë shumë bindshëm dhe me vendosmëri. Ai ka qenë i qartë se Irani nuk duhet të ketë armë bërthamore dhe as kapacitet pasurimi të uraniumit.”
Deklaratat e Netanyahu-t vijnë në një kohë të tensionuar, ku marrëdhëniet ndërkombëtare janë vendosur nën presion për shkak të rritjes së përplasjes mes Izraelit dhe Iranit, me pasoja të mundshme për sigurinë rajonale dhe globale.
Zyrtarët amerikanë ende nuk kanë komentuar zyrtarisht mbi deklaratën e Netanyahu-t dhe përfshirjen apo dijeninë e SHBA-së për operacionin në fjalë. /Versus.al/
