Një valë e fortë të nxehti ka goditur Barcelonën, duke sjellë një rekord të ri temperaturash në qytetin spanjoll.
Termometri në Observatorin Fabra ka shënuar 40.5 gradë Celsius, temperatura më e lartë e regjistruar në këtë pikë matjeje gjatë 112 viteve të fundit. Sipas autoriteteve meteorologjike, kjo vlerë ka thyer rekordin e mëparshëm prej 40 gradësh Celsius, të vendosur në korrik të vitit 2024.
Edhe aeroporti El Prat ka regjistruar temperatura të pazakonta. Sipas agjencisë kombëtare të motit në Spanjë, AEMET, termometri aty arriti në 37.7 gradë Celsius, duke shënuar nivelin më të lartë që prej vitit 1924.
“Barcelona ka regjistruar ditën më të nxehtë”, deklaroi zëdhënësi i AEMET, José Ángel Núñez, duke konfirmuar se matjet në dy stacionet kryesore të qytetit treguan vlera rekord.
Ndërkohë, shkencëtarët paralajmërojnë se ndryshimet klimatike të shkaktuara nga aktiviteti njerëzor po ndikojnë në rritjen e shpeshtësisë, intensitetit dhe kohëzgjatjes së fenomeneve ekstreme të motit, veçanërisht valëve të të nxehtit.
Temperaturat e larta kanë prekur zona të ndryshme të Spanjës, duke rritur shqetësimet për ndikimet në shëndetin e njerëzve, mjedisin dhe sektorë të ndryshëm të ekonomisë./Versus.al
