Platforma X, në pronësi të Elon Musk, ka sulmuar ashpër autoritetet franceze të drejtësisë, duke i akuzuar për një “hetim penal të motivuar politikisht” që, sipas saj, synon të kufizojë lirinë e shprehjes së përdoruesve. Në një deklaratë zyrtare, X mohoi të gjitha akuzat dhe tha se nuk do të bashkëpunojë me autoritetet franceze.
Hetimet paraprake, të nisura në fillim të korrikut nga prokurorët francezë, kanë për qëllim të zbulojnë nëse kompania ka manipuluar algoritmet apo ka mbledhur të dhëna personale në mënyrë të paligjshme. Në këtë kuadër, policia mund të marrë masa të tilla si kontroll elektronik, marrje në pyetje të vetë Musk apo stafit të X, apo edhe lëshim urdhrash arresti në rast mosbashkëpunimi.
Sipas platformës, kërkesat e autoriteteve përfshijnë dorëzimin e të gjitha postimeve të përdoruesve, të cilat do të analizoheshin nga studiues që, sipas X, kanë treguar më parë “qasje armiqësore” ndaj saj. Platforma e cilësoi këtë si një shkelje të rëndë të parimeve demokratike.
“Bazuar në informacionin që kemi, besojmë se kjo çështje keqinterpreton ligjin francez për të ndjekur një agjendë politike dhe për të kufizuar lirinë e fjalës”, thuhet në reagimin zyrtar të X.
Kritikat ndaj hetimit janë përqendruar edhe në faktin se çështja po trajtohet në kuadër të ligjit për krimin e organizuar, i cili i jep policisë kompetenca të zgjeruara, përfshirë mbikëqyrjen e pajisjeve personale të punonjësve të X.
Nga ana tjetër, deputeti francez Éric Bothorel, i cili akuzoi platformën për manipulim të algoritmit dhe nxitje të ndërhyrjes së huaj, mbrojti pavarësinë e drejtësisë franceze, duke shtuar se “liria e fjalës nuk mund të jetë pa kufij”.
Ky hetim pritet të thellojë më tej përplasjet mes Shteteve të Bashkuara dhe Bashkimit Europian mbi rregullimin e përmbajtjes në internet. Ndërkohë, Komisioni Europian po zhvillon një hetim të veçantë ndaj X për shkelje të rregullave të BE-së kundër përmbajtjes së paligjshme në rrjet.
